Mizoram Maxi Cab Owners’ Association (MMCOA) General Headquarters ina huaihawt Football Tournament vawi 2-na chu vawiin khan Chief Minister Pu Lal Thanhawla chuan Rajiv Gandhi Stadium, Mualpuiah a hawng. 

Hawnna inkhawm stadium gallery zawla buatsaihah Chief Minister chuan maxi cab neitute leh driverte inkara inhmelhriat tawnna leh thawhhona tha zawk duh vanga hetiang hun siam a ni chu  anachang hriat thlak hle a ni a ti a. Ani pawh motor khalh thin ve tho anihnaah he huna tel ve awm renga a inngaih thu a sawi a. Chief Minister chuan ram siamnaah mi pawimawhlo tumah kan awmlo tiin, mi lian leh te ber thlenga ram leilungfa kan nihnaah kan pawimawhna a inang vek a, kan thawhna hmun leh hun a inanglo mai chauh a ni a ti.

Chief Minister chuan sorkarin driverte pawimawhna leh an mamawhte chu a hria a, nimahsela vawilehkhatah an mamawhte kan phuhruk vek theilo a, theihtawp kan chhuah reng a ni a ti a. Maxi cab driverte chu an kutah an passengerte nunna a awm ani tih hria a chhunglam leh pawnlamah fimkhur hle turin a chah a. Hawihhawm taka mawhphurhna an neihte kengkawh tura chah bawkin, meizial zuk chungchangah te an passengerte entawntlaka awm turin a fuih bawk a ni.

Chief Minister chuan Mizoram driver ten tul lova horn an hmet ri mai mailo hi pawnlam mite mak tih a tling a ni tiin, an hawihhawmna a chhuanawm hle a ni a ti a. Maxi cab stand tur ram sorkarin a ngaihtuah mek reng a ni tiin duh ang erawh anla hmu mailo a, an hamthatna tur sorkarin a dap reng a ni a ti. Pu Lal Thanhawla chuan he infiamna atang hian driver ten mahni inthununna tha zawk an zir chhuah ngei a beisei thu a sawi bawk a ni.

Chief Minister chian maxi cab music video a tlangzarh bawk.

Sports Minister Pu Zodintluanga pawhin thu sawiin tuten emaw hetiang inkhelh mai maiah Chief Minister a kal tia sawi awm mahse, Chief Minister hi mitin tana inpe, mitin tana thawk anihzia tilang tu leh tichiangtu a  ni zawk a ni a ti.

Hawnna inkhawm hi MMCOA President Pu R.Lalhmunmawia’n a kaihruaiin, Mizoramah maxi cab service hi kum 1997 atang awm chho tan anih thu a sawi a. He tournamentah hian Mizoram  khaw hrang hranga maxi cab tlan thinte teamah insiamin, nikumah team 13 an luh laiin kuminah chuan an vaiin team 24 an insiam a ni. Inkhelh hun pumpui chhung hi minute 50 (25 + 25) a ni ang a, half time chawlh minute 10 an hmang bawk dawn a ni. Champion teamin Rs.10,000/- leh trophy an dawng anga, pahnihnain Rs.7000/- leh trophy an dawng bawk ang.

Tournament hi National Business Enterprise, Khatla ina a bultum a ni.