Vawiin chawhma dar 11:00 khan I & PR Auditorium-ah Mizo Photographers’ Society buatsaihin, vawi khatna atan World Photography Day vawi 4-na rualin Photography Day hman a ni.
He Ni pawimawh tak hmanna ah hian, Pu David L. Thangliana, Chief Media Officer, NLUP Media Cell, NIB / I&PR chu Khuallian niin, Pu Vanlalrema Vantawl, Vice President, MJA Gen. Hqrs. chu Khualzahawm a ni bawk.
World Photography Day hmanna hi Pu Lalsangzuala, President, Mizo Photographers’ Society chuan kaihruaiin MPS ten an thil tum Mizo mipuite hnena thlalak hmanga hmanlai mizo thil hlui leh hmasawnna awm chho pholan te a sawifiah a, Pu Johny Ngurthansanga, Gen. Secretary MPS pawhin Power Point Presentation hmangin, MPS te hmalak mek leh chhunzawm tur, nungcha, thing leh mau chi hrang hrang, Mizo Puk, Lungphun leh thil dang tam tak a tarlang bawk.
Thlalak lama tui hmasa leh tun thleng pawha an thlalak chhuanawm tak tak mi engemaw zat hnenah MPS te aiawhin Khuallian hian Certificate mawi tak a hlan a, tumruhna leh taimakna tak tak nen sorkar leh mipui tana tangkai zawnga an thiamna leh tuina te hmang tangkai turin Photographers ho te fuihna a nei.
Chawhnu lamah MPS te hian Workshop an nei nghal bawk a ni.
Mizo Photographers’ Society hian Thalfavang Kut 2012 khan Tourism department nen thawk hovin Hmuifang ah photo exhibition hlawhtling takin a nei a, kumin Chapchar Kut khan I&PR Department nen thawk hovin Vanapa Hall ah Chapchar Kut Photo Exhibition an lo huaihawt tawh bawk a ni. Heng bakah hian Aizawl ah photographer Workshop for Beginners tum khat an nei tawh a, Lunglei ah buatsaih a ni tawh bawk.
Kumin March thla khan YWCA nena tangkawpin Safer Sex tih thupui hmangin photo competition an huaihawt a, June thla khan NACO hnuaia RRTC nen thawk hovin 26th International Day Against Drug Abuse and Illicit Trafficking den chhenin photo competition an lo huaihawt tawh bawk a ni. Kumin kum tawp lam hian Grand Photo Exhibition huaihawt an tum bawk.
Mizo Photographers’ Society hi Mizoram Sawrkar hnuaia registered society niin MSR 487 of 4.12.2012 hmanga registered a niin member 68 an awm mek a ni.
