“Sansad Aadarsh Gram Yojana” hmalakna kal zelah PHE Department, Serchhip WATSAN Division chuan vawiin khan Chief Minister Pu Lal Thanhawla’n Model Village a siam tura a thlan Buangpui ah Faina kawnga inzirtirna Nationwide Sanitation/Cleanliness Awareness beihpui an thlak a, Serchhip District Bawrhsap Dr. Lalrozama, IAS chuan khuallian niin he hun hi a hmanpui.

Khuallian Dr. Lalrozama chuan thu sawiin Buangpui chu khaw fai tak niin, kum 2011-a khawfai chawimawina an lo dawng tawh pawh chu an phu hle a ni a ti a, faina kawngah SDO (C) Thenzawl kaltlangin Village Council te nena tang hova theihtawpa hma lak chhunzawm zel an inhuam thu a sawi a. Mihring ten natna hrang hrang kan kai thin hi a tam zawk chu ka atanga lut ani thin a, kan lo hrisel zawk nan faina mai bakah kan ei leh in tihthianghlim kan ngaihpawimawh a tul hle a ni a ti.

Bawrhsap chuan Malaria avanga thi kan awm fo thin te pawh a hi a chhan bulpui pakhat chu kan in leh a velte kan vawnfai tawk loh thin vang a ni a ti a, faina kawngah hma kan sawn zel a tul a, mithiamte min zirtirna te pawh a taka kan la zawm famkim theilo a nih pawhin kan rilruah vawng reng ila, engtikah emaw chuan hmasawn nan kan la chhawr tangkai ngei ang a ti a ni.

Er. K. Lalrintluanga, SDO, PHED Serchhip WATSAN Sub-Division chuan kalkhawmte hnenah kut silfai pawimawhna sawiin natna hrang hrang kan kai thin za zela 80 vel hi kut sil fai tawk loh vang a ni a, kum 2008 atanga kut silfai Ni hman a nih hnu kum khat chhungin kut sil fai loh avanga natna in a thlen thihna chu za zelah 45 ah a tla hniam hman a ni a ti. Kut sil fai hi Naupang hri danna kan pek thin ang thoa pawimawh a ni a, fai taka kut sil hian hri danna lak aiin natna kai tur a veng tha zawk a ni a ti a, kut sil fai dan hi a takin a zirtir nghal bawk a ni.

Buangpui Community Hall a he hun puala inkhawm buatsaih hi Er. Lalhruaia, Sr. EE, PHED, Serchhip WATSAN Division chuan kaihruaiin Faina beihpui thlak anih chhan leh India Sawrkarin faina kawnga hma a lo lak tawh dan hrang hrang te a tarlang a, Buangpui khua chu faina kawnga hma an lo lak tawhna ah fakawm a tih thu leh tha thlah miah lova khaw dangte entawn tura tan la sauh sauh turin a kalkhawmte a fuih Buangpui khuaah hian Chhungkaw 103 awmin mihring 500 vel an cheng mek a, vawiina Sanitation/Cleanliness Campaign ah hian mipuite leh School naupangte an kal tha hle a, Pu K.Lalhmuakliana SDO (C) Thenzawl pawhin he hun hi hmanpuiin, Serchhip atangin Pu ST Lalhmingmawia, Sanitation Officer, UD&PA pawhin a hmanpui bawk a ni.