Vawiin ah khan Governor Lt.Gen.(Rtd.) Nirbhay Sharma leh a nupui Pi Jyotsna Sharma te chuan Aizawl khawpui hmun pawimawh tak tak an tlawh a. Heng zing ah hian Aizawl Theological College(ATC) leh Hermon Children Home, Durtlang, Gilead Special School, Bawngkawn, Hindustan Club, Babutlang, Seventh Day Adventist Headquarters leh Helen Lowry School, Nisarih Tlang bak ah Bethel Camping Centre te a tel a. Governor hian mipui dinhmun hriatchian a duh bakah mipui tan tangkai zawk a hna a thawh theihnan hmun dang te pawh tlawh a la tum a ni.

Aizawl Theological College(ATC),Hermon Children Home, Seventh Day Adventist Headquarters , Helen Lowry School leh Bethel Camping Centre ah te Governor pual hian programme siam a ni a. Gilead Special School ah erawh chuan class room te fang kual in zirtirtu leh naupang ho nen hun a hmang thung a ni. ATC Zirlai te hma ah thusawiin Governor chuan sakhaw hrang hrang inkara inngeihlohna leh tharum thawhna lo chhuah thin chhan ber chu sakhaw pakhat lak vawng vang leh midang te sakhua hriatchian loh vang a ni thin a. Inzahder tawnna tel lo chuan sakhuana vanga buaina a chhuak thin a ti. ATC chuan Mizoram thalaite tihhmasawnna ah theihna tam tak a nei tih a hriat thu a sawi a, Pathian thu an zir piah lamah mipui vantlang tana rawngbawlna ah tun aia nasa zawka hma la zel turin a sawm a ni. Minority tunlai khawvel ah an awm tawh loh thu Seventh Day Adventist kohhran puipa te bulah sawiin India danpui hnuaiah sakhaw hrang hrang be tute an zalen a ni a ti a. Seventhday in mipui tana rawngbawlna a theih tawpa kalpui thin chu lawmawm a tih thu a tarlang.

Hermon Children Home leh Bethel Camping Centre a hnathawktute inpekna chuan a nun a khawih thu sawiin mahni mihringpui te tanpuina hna thawh aia hna ropui leh Pathian biakna urhsun a awm chuang lo a ti. Sikul a tlawhna ah Mizoram thalaite chuan rilru inhawngin chungin Khawvel hmundangah thiamna zir se, hnamdang te zau zawka kawm in an tawng te thiam se tun aiin nasa takin an hlawhtling ang a ti a. Zirtirtu leh leh zirlai zirchhuaktawh intelkhawm, Alumni association Mizoram ah tam zawk leh thatho zawk awm se zirlaite tan phurna nasa tak a siam a rin thu a tarlang a. Zirlai te a fuihna ah Governor chuan Zoram naupang leh thalai te hian khawvel ah a ber ni turin thiamna leh theihna an nei a, tumruhna leh taihmakna erawh a ber ni tur chuan thiam leh thei te pawn an neih ngai a ni a ti. India ram chhung leh pawn ah chhawr tlak ni turin English leh Hindi bakah hnamdang tawng a tam thei ang ber thiam nal a ngai a ni a ti. Hindustan Club a member te pawh Mizo thalai ten Hindi an thiamna tura tlawmngai pawl te hmalak pui tur leh an member ah Mizo thalai te an tel ve theihna tura insiam rem tur in a fuih a. Ruang halral thin ten Mithi sawngbawlna kawnga an harsatna te pawh lo enfiah sak a tiam a ni. Mi tin in thilsual an tih palh vek theih thu Bethel Camping Centre a ruihlo ngai enkawl mek te hma ah sawiin, mahni insiam that nan leh kawng dik zawh nan khua a tlai lo tih a hrilh a. An chet pelhna chuan beidawnna ah a hruai luh loh nan beiseina leh rinna nen an saltanna atanga zalenna sual turin an beih a ngai a, hnehna an chan hun tur an chhungte leh Mizoram in tawngtai leh beiseina nen a lo thlir a ni a ti.

Governor chuan a programme hmanna a zirlai leh hotute chu Raj Bhavan tlawh thin tur in a sawm a. A thil hmuh leh hmalakpui ngai lai nia a hriat te pawh lo zirchiang in a tul anga hnathawh a tum tih a tarlang a ni.

Report ah tarlan a nih ang in Hermon Children Home ah belhtur leh chawmtu nei fumfe lo naupang 78 enkawl a ni a, Bethel Camping Centre ah thalai chepelh tawh nunkawng dik kawhhmuh leh mek 600 chuang an awm mek . ATC ah hian Pathian thu zir 150 an awm mek bawk.