Mizoram Planning, Economics and Statistical Service Association in ni hnih chhung awh tur Refresher Course Programme vawiina I & PR Conference Hall a buatsaihah Chief Minister Pu Lal Thanhawla chu khuallian a ni.

 

 

Chief Minister chuan sorkar hnathawk ten hetiang intuaitharna an nei hi a department tan mai nilo, sorkar tan hian a tha em em a ni a ti a. Sorkar thar kan ni a, sorkar hmasa kihhnawk nasa lutuk thianfai chung zela kal hram hram kan nih avangin duh angin thil a tih zung zung theih lova. Hnathawh dan kalphung leh felfai a awm bawk loh avangin kawng tinrengah tan lak angai a ni a ti. Sorkar laipui, zau taka inhawng reng pawh hi zuk pawh turin kalphung mumal kan neih loh avangin kan inpeih thei lo a ni a ti a. Chuvangin,hnathawh dan kalphung mumal leh felfai tha kan neih angai a ni a ti. Pu Hawla chuan sorkar chu langtlang sorkar ani tur a ni tiin, langtlang lo sorkarah chuan eirukna a hluar nasa thin a ni a ti.

Chief Minister chuan dik taka sorkar a kal theih nana statistics dik nei thei turin nangni hi in pawimawh a ni a ti a. Department te, felfai, thawk tha leh inthunun tak neih hi department lian tawp tak ai chuan sorkar leh mipui tan a tangkai thei zawk a ni a ti a. State Planning Board chu chak taka hna a thawh theih nan tih chak anih tur thu a sawi a. Association in rawtna a siam, Plan sum hman dan umzuia endiktu tur Plammimg Board hnuaia Monitoring and Evaluation Cell din nise an tih chu, Chief Minister chuan tha a tiin bawhzui a ni ang a ti a. Thil dang an sawilan chungchangah, sorkar thar hlim mai an la nih avangin la inzir chho mek zel an nih thu sawiin, tha taka hna an thawh theihna tur anih phawt chuan a tul ang te chu en chhoh zel ala ni ang a ti.

He hun hi Pu Ngunlala Chinzah, President, MPESSA in a kaihruai a ni.