Kum 1972 March ni 23 a din, Mizoram Journalists Association chuan vawiin khan General Conference vawi 36 –na Aizawl Press Clubah an hmang a, Chief Minister Pu Lal Thanhawla chu Khuallian a ni.

 

 

Chief Minister chuan jourmalist te chu mipui rawngbawltu an nih angin mi te innghahna tlaka awm hi an tih tur a ni a ti a. An pawimawhna hi midangin an rawn hriat aiin, mahni inhriat angai zawk a ti. MJA hi mi hrang hrang intelkhawmna a ni a, thil tha leh hmasawnna duh vek an nih angin, an zingah inelna thianghlim a awm te hi tha a tih thu a sawi a. Chanchinbu tha tehna ber chu ‘editorial’ hi a ni tiin, Editorial hian a neitu leh a chanchinbu that leh that loh a tarlanga. Mipuiin ngaihdan an siam theihna, an rilru kaihruaitu anih bawk avangin a pawimawh em em a ni a ti. Amah ngei pawh chanchinbu lo enkawl tawh thin leh MJA Founder President lo ni tawh anih angin, MJA din tirh chuan an dinhmun chu chau tak anih thu sawiin, editorial te chu an mimal lehkhathawn (private letter) ziah mai mai thin thu a sawi a. Tunah chuan ngaihtuahna nasa tak seng chunga uluk taka ziak ani tawh chu lawmawm a tiin, an dinhmunte pawh a changkang tawh hle a ni a ti.

Pu Lal Thanhawla chuan Journalist Accreditation Policy, Journalist Welfare Fund leh Advertisement Rules te chu ennawna siam that anih tur thu a sawi a.Mizoram chhunga khawtlang nun, mipui hriselna, zirna, hnam inpumkhatna leh inunauna, khua leh tui zahawm nihna leh kawng dang tam taka journalist ti tha chungchuang te hnenah pawisa fai leh certificate pek dan ngaihtuah anih tur thu a sawilang a. Sorkarin huaisen taka hma a lak zat zat theih nan mipui tana hnawksak leh harsatna awm reng rengah, chanchinbu ah huaisen taka tarlang vat thin turin a chah a. NLUP chungchang sawilangin Chief Minister chuan kan inpeih hunah kan sem anga, kan tihlawhtling dawn a, a dawngtu te rinawmna a pawimawh hle ang tiin, an programme anih angin midangte sawipui kan mamawh lo a ni a ti. Pu Lal Thanhawla chuan Mizoram chhungah pawnlam mi nuai khat leh singnga vel awm rengte hian ei tur leh hnathawh tur an neih theih reng laia tual chhung mi ten ei tur a harsa, inhlawhna tur hna a awmlo an tih reng hi, kan inbihchian angaihzia tilangtu mai a ni a ti. Kan taimak phawt chuan inchimral hlauhna te hi a awm lo ang a ti a. Chutilova tun ang renga kan awm anih chuan min la chimral tho tho ang a ti.

Conferenceah hian MJA President Pu K.Sapdanga chuan ‘Presidential Address’ neiin MJA hi NGO anga pressure group an nih ve loh thu leh nih pawh a tul loh thu a sawi a. A journalist pui te chu thil tihna ah reng reng Association hi hmatheha nei lovin kan profession, kan hna pawimawhna zawk hi I dah lal zawk fo ang u tiin a chah a ni.

 

Financial Report pek bakah kum 2008-09 chhunga sum hmuh zawng zawng chu Rs. 5,63,133.00 a ni a, hmanralna zawng zawng Rs. 3,05,060.00 niin tuna pawisa la awm chu Rs. 2,58,073.00 a ni.

Inkhawm hi MJA Vice President Pu Lalthanzama’n a kaihruai a. Kum 2008  chhunga an member pui thi te sunna hun an hmang a. District hrang hrang atanga MJA member te an kal tha hle a, inkhawmna ah an leng lo hle a ni. Chawhnu lamah rorel inkhawmna an nei zui nghal bawk.