2647/2025-2026

Dated Aizawl, the 12th December, 2025 : Vawiin khan Chief Minister Pu Lalduhoma chuan a office-ah Mizoram State Commission for Protection of Child Rights (MSCPCR) Chairman leh member-te a kawm.

MSCPCR official-te chuan Chief Minister chu Commission chungchang sawipuiin, naupangte aw ni tura sawrkar laipuiin Commission chu a din a nih angin, chak zawka naupangte dikna chanvo (rights) an humhalh theihna tura hmalak dan turte an sawiho a. Chief Minister chuan Mizorama POCSO case a pung zel chu pawi a tih thu sawiin, naupangte laka pawikhawihtute chungthu rang taka relfel leh naupangte dikna leh chanvo humhalhna dante tha taka kenkawh chu a ngaih pawimawh thu a sawi a ni.

Vawiin hunah hian Pu Jimmy Laltlanmawia, Chairman, MSCPCR, Pi Lalengvari, Member Secretary, MSCPCR leh member dangte an tel a ni.

MSCPCR hi Parliament dan siam ‘The Commission for Protection of Child Rights Act, 2005’ hnuaia din a ni a. Parliament dan siam hnuaiah hian Mizoram Sorkar chuan a taka kalpui thei turin ‘The Mizoram State Commission for Protection of Child Rights Rules, 2017’ a siam a, hemi hmang hian MSCPCR chu February, 2018 thla khan din a ni.

MSCPCR hmalaknain School Education Department-ah routine school inspection neih thin a ni a, Safety of School research-a hmuhchhuahte atangin Recommendation a siam a. Kum 2023 khan Aizawl District Court-ah ‘Child Welfare Officer Room leh Children’s Room’ siam tir a ni a, naupang 814 hmang tangkaitu awm tawhin heng zinga 113 te chu POCSO case avanga court-a kal an ni.