857/2024-2025

Dated Aizawl, the 19th June, 2024: Vawiin khan Chief Minister Pu Lalduhoma chuan Raising and Accelerating MSME Performance (RAMP) Kick-off leh Facilitation Cell hawnna, Vanapa Hall a buatsaih chu a telpui.

Thu a sawinaah Chief Minister chuan, covid19 hripui vang khan Industry ten harsatna an tawk nasa a, heng kan Industry te hian chak zawka hma an lo sawn leh theih nan Central sawrkar chuan RAMP hi a rawn duang a ni. State te chu keimahni mamawh ang zawnga guidelines duan min rawn phalsak a. Kan mamawh ang tak leh kan policy milin a kalpui dan tur kan duang a, a hming pawh hi MSME Elevate Mizoram (MEMiz) tiin kan vuah ta a ni. Tin, kan industry neihsa leh ding chho zel tur ten tangkai taka an chhawr turin Facilitation Cell din a ni bawk a, kan lawm hle. India ram economy za zela 30 vel hi small scale Industry te thawhchhuah a ni a, hna thawktu zaa 46 vel te hi small scale a thawk te an ni bawk a. Chuvang chuan keini pawhin kan Hand Holding Policy leh heng central schemes te hi kaikawpin nasa takin hma kan la dawn a ni. Kan sawrkar veleh khan Mizoram Investment Policy, 2024 kan siam nghal a, kan tangkaipui tur investor te kan dap zui a. Mizoram State Industrial Policy, 2012 pawh ennawn mek a ni. He Policy hnuaiah hian State Incentive Subsidy Scheme a awm a, mahse pawisa hi hun rei tak dah a lo ni ngai tawh lo thung a. Kan sawrkar veleh khan SIS ah hian Rs. 42.31 lakh chu revised estimate angin kan dah nghal a. Kumin sawrkar kumah pawh Rs. 42.31 lakh tho hi kan dah leh a ni, tiin sawrkar hmalakna tlangpui a sawi. Sawrkar hian kan ram dehchhuah thilte chawilar kan duh avangin The Mizoram Preferential Store Purchase Rule pawh tha taka kalpui kan tum a. Chu chu kan industry ten an lo hlawkpui kan beisei. Sawrkar office te chu an bungrua thlak a tul hunah Mizoram thilsiam zela thlak tawh turin kan ti a ni, a ti bawk.

Industry hi economy innghahna pawimawh a nih avangin miin theihna a neih phawt chuan hmalakna kalpui se; kan mihausa te pawh hian thianho leh pawl (company) ang tein industrial unit te, service sector unit te rawn din chur chur se kan duh a. Theihtawp kan lo chhuahpui ang a, Industry lama harhna thlentir kan duh a ni. Amaherawh chu sawrkar tanpuina chauh beisei, hlawhtlin tum tak tak lo, a thlawna pawisa dawnna tur emaw ti te tan erawh chuan “Bui lung tawk” ang hlauh kan ni dawn. A thlawna sem, a thlawn a dawn, kan moral eichhetu hi kan malmak hmiah dawn a ni, a ti.

RAMP bakah hian MEMiz website leh MSME Facilitation Cell te Chief Minister hian a hawng a ni.

Pu F. Rodingliana, Commerce & Industry Minister pawhin thusawiin, ngaihtuahna thar pua Mizote hian thil kan tih a ngai. Kamding nih aiin Mahni kea ding nih kan rilruk ngam a tul tawh a, midangte thuhnuaia awm lova mahni thu anga hnathawhna, pension awm ve lo, tu leh fate thlenga chhawm theih eizawnna a ni. Entreprenuership hi uar takin kan kalpui dawn a, a tul angin Dan te pawh kan ennawn ang a, Industry te mamawh power siam chhuah thlengin kan bei zel dawn a ni, a ti.

Inkhawm hi Pi Florence Zotluangpuii, Director, Commerce & Industry chuan a kaihruai a, Pu Lalhmunsiama, Nodal Officer for RAMP chuan RAMP leh Facilitation Cell kalpui dan tur leh India ramin Industry a enkawl dan tlangpui te a sawi. Tunah hian MSME sumdawnna unit 34900 vel Mizoramah an awm mek a, a zatve aia tam te hian Udyam registration an la nei lo a ni.

RAMP Kick-off programme ah hian Minister, MLA leh sawrkar official pawimawh leh industry neitu engemawzat an tel a. Pi Sangchhin Chinzah, Secretary, Commerce & Industry in lawmthu a sawi zawhah Rev Vanlalbela'n tawngtaiin hun a khar a ni.