856/2024-2025

Mamit 19th June, 2024 : Pu B. Lalchhanzova, Food Civil Supplies and Consumer Affairs leh Land Revenue and Settlement changtu Minister chuan vawiin khan Mamit Chhim Veng YMA Hall-a MZP zirlai titha chawimawina programme chu khuallian niin a hmanpui. 

Khuallian chuan Mamit District tan vawiina kalkhawmte chu mi tangkai leh hlu zawk kan ni thei a, thusawi thiam nih pawimawhzia sawiin inrintawkna nena mahni ngaihdan sawichhuak thei tura inzir turin a chah. Kan District, kan khua, kan veng leh kan sikul atangin thil tha a chhuak ve thei a ni tih hrethar turin a chah bawk. Mizoram Sorkar chuan ruihhlo a do mai bakah ruihhlo ngaite enkawlna lamah hmalak zel a tum thu sawiin zirlaite chu ruihhlo laka fihlim tur leh zo takin an thiltih apiangte rintlak leh taima taka ti thin turin a chah bawk.

Minister chuan zirlai kalkhawmte chu midangte min tihphur nghak lovin mahni leh mahni intiphur thin turin a chah a. Ka thei ve a ni tih rilru kan put tlat chuan kan hlawhtling thei a ni tih hria a, beidawng lova bei fat fattu ni turin a chah. English tawng kan thiam leh thiam lovah buai lutuk lo tura chahin English thumal thiam tam tum tur te, chapo si lova mahni inngaihlu tur te, ngeiawm si lova inrintawkna nei turin a chah bawk. Mamit khawpui chhung leh a luhka kawngpuite chu a theih ang anga siam that deuh anih theih nan PWD Minister hnen ngenna DO (Demi Official) Letter ziah a tum thu a sawi bawk a ni.

Khualzahawm Er. H. Lalzirliana, Mamit bialtu MLA pawhin zirlai pass thar te chu insit lova tumna sang tak nen hmalam pan turin a chah a. Kan zirna hmun leh kan chawrchhuahna khua te, kan nu leh pa te chu changkansan lovin zahawm taka changkanpui zawk turin a chah a. Mamit tan, kan khawtlang tan tumruhna nen theihtawpa zir a, hlawhtling ngei turin duhsakna a hlan.

He huna Khualtha Pu Laldingliana, DEO/DPC, Mamit, Uaptu Pu H. Lalthianghlima, President, MZP Gen.Hqrs bakah Pu Lalthansanga, President, MZP Hqrs. Mamit pawhin thu an sawi bawk. 

Vawiina Zirlai titha chawimawina hlante hi Class X zirlai Distinction-a pass mi 10, First Division-a pass mi 26 an vaiin mi 36 leh Class XII zirlai Distinction-a pass 3, an vaiin mi 39 an ni a. Best School Award St. Francis of Assisi School hnenah hlan an ni bawk.

He hun hi Pu Lalkroshlua, Vice President, MZP Hqrs. Mamit chuan kaihruaiin Pu George Lalruatmawia, Secretary, MZP Hqrs. Mamit chuan inhmelhriattirna neiin report a pe a. Pi Lalchhiarpuii, Fin.Secy, MZP Hqrs. Mamit-in lawmthu sawina a nei bawk.

Vawiin vek hian Minister hian a Department chan DCSO Office leh SO Office te a tlawh nghal bawk a ni.