Chief Minister Pu Lal Thanhawla chuan vawiin khan Mizoram State Olympic Association office, Khatla-a F. Hrangvela Building 1st Floor ami a hawng.

Hawnna inkhawm office Conference Room-a buatsaihah, Chief Minister, MSOA President ni bawk chuan kum 25 din anih hnua mahni puala Mizoram State Olympic Associationin office a nei ta chu hmasawnna rahbi thar ani a ti a. Mizoramah Sports Council te a awm chungin, Olympic movement hi siam a, neih ve hi tula an hriat avanga association hi din anih thu a sawi a. Tunah chuan pangngai taka a kal chho thei ta hi a lawmawm hle a ni a ti. Mizote hi ei leh inah insum theilo hnam kan ni a, amaherawhchu, awareness avangte in tunah chuan kan ziaawm tawh viau a ni a ti a. MSOA hi thalai infiammite tana national leh international thlenga hruaitu anih avangin Sports Association hrang hrang ten office thar hi mahni ta anga nei turin a chah a ni.

MSOA Vice President Pu Zodintluanga, Minister for Sports chuan MSOA hi Sports Association zawng zawng ten tawiawm turin a ngen bawk a ni.

Mizoram State Olympic Association hi kum 1984 a din tan niin, Pu Lal Thanhawla hi President hmasa ber a ni a. Infiammi ten national leh international an kalna chungchanga lo buaipui hi a hna ber pakhat a ni a, hemi bakah hian association hrang hrangte inlaichinna, administration a enkawl bawk a, affiliated association hrang hrang 17 an awm mek bawk a ni. Tuna an office hi nikum 2011 August thla atang khan thla tin Rs.10,000/- chawiin an luah a ni a. Office ah hian office bearer te theuh room tur bakah, conference tables & chairs, Fax leh Xerox machine leh office hnathawhna tuldangte a awm a. Office secretary pakhatin a enkawl a ni.Kum khat chhunga an budget hi Rs.25 lakhs ah tihsan tawh a ni bawk. Kum 2009 - 2013 chhung atana office bearer te chu President ; Lal Thanhawla, Vice President : Zodintluanga & Zothankimi, Secretary General : Zoliana Royte, Traesurer : C.Lalthantluanga, Joint Secretary : Lalremtluanga te an ni a, Association hrang hrang atangin Executive Member 10 an awm bawk.

Attachment

  • Loading attachment...