Chief Minister Pu Lal Thanhawla chuan vawiin chawhnu khan MULCO Complex, Thuampuiah NLUP sum hmanga sak Indigenous Milk Product Plant a hawng.

Chief Minister chuan MULCO hmalakna a Indigenous Milk Product Plant chu Mizoram tan hmasawnna rahbi thar a ni a ti a. Sorkar departmenta mithiamten thahnem an ngaih chuan Minister te pawh kan hmingtha thei a ni a ti a. Mithiam hmathlir tha tak neite hi ram tan an pawimawh hle a ni a ti. Hmasawn tumlo department te chu angaiah an la awm char char tih sawiin, kan thlen chin atang zelin kalphung thar leh tha zawk ngaihtuah chungin hmasawn kan tum tur a ni a ti.

Chief Minister chuan MULCO chu Mizorama Society hlawhtling ber nia a hriat thu sawiin, thawktute hmalaknaah leh thahnemngaihna avangin tun hi kan thleng a ni a ti a. India ramah kum 1970 chho velah Anand Milk Union Ltd. in AMUL an rawn siam chhuah thu sawiin, Pu Hawla chuan sorkar laipuiin ‘White Revolution’ an tih hnuaiah ‘Operation Flood’ an tan a, chuta tang chuan bawnghnute thar chhuaktute chu Society (coopretive) a insiamin, bawnghnute a intodelh piah lamah a sawngbawlna hmangin milk product hrang hrang an siam chhuak ta a ni a ti a. MULCO pawhin theihtawp chhuahin bawnghnute mai bakah bawnghnute atangin ei tur thianghlim chi hrang hrang ‘dahi’(doi) te, lassi te, ice cream te leh thil dang dang an rawn siam chhuak ve a a ropui hle a ni a ti.

Chief  Minister chuan NLUP thatzia hi he Plant hawn tak atang hian a hriat thei a ni tiin, NLUP hnuaia bawng vulh thlangtuten MULCO dawn sen loh bawnghnute an thar a, chu bawnghnute atang chuan thil siamte hi alo awm thei ta a ni a ti. Cooperative Union hi kan ram ang ziak leh chhiar tamna ah chuan a hlawhtling thei hle a ni tiin, cooperative movement hi tih tak zeta kan tih chuan nasa takin a hlawhtling thei a ni a ti.

Khualzahawm Pu C.Ngunlianchunga, Minister of State for AH&Vety chuan a department hmalakna hrang hrangte a sawi a. Tunah hian nitin bawnghnute litre 20,000 tharchhuah a ni a ti a. Bawnghnute atanga ei tur siam zawrhna dawr pawh Aizawlah hmun 10ah siam a nih thu a sawi a. RKVY atanga hmalaknate pawh a sawilang bawk. Minister chuan tunhnaia chanchinbu thenkhat leh TV lama sawichhuah, Minister pakhatin silpouline 6322, Rs.45.32 lakhs man a lak thu tarlan chungchang sawiin, Minister chuan kha thil thleng kha kum 2006 a thil thleng a ni a ti.

Khualzahawm dang Pu JH Rothuama, MLA & Chairman, NLUP  Implementing Board chuan Plant hawn tak chu Mizoram tana tangkai tur tak kan nei dawn ta chu a lawmawm tak zet a ni a ti.

Indigenous Milk Product Plant din tur hian kum 2013, June ni 24 khan Chief Minister Pu Lal Thanhawla chuan a lungphum a phum a. A plant satu contractor hi S.S.Services Dhruva Market, Ganeshguri, Guwahati niin, 18th July 2014 khan sak tan a ni a, Rs. 2,01,28,832/1 senga sak a ni a. Khawl man, bun man leh commission atana senso zawng zawng hi Rs.1,38,61,000/- a ni bawk a. He Diary Plant hian nitin bawnghute litre 5000/- a sawngbawl thei dawn a ni. Bawnghnute atanga thil siam chhuahte hi toned milk, sterilised milk, paneer, curd, lasi, leh ghee te a ni.

Hawnna inkhawmah hian Ministers of State, Dy Speaker (Bialtu MLA) leh Parliamentary Secretary te an tel a ni.