Higher & Technical Education changtu Parliamentary Secretary Pu H. Zothangliana chuan vawiin khan Govt. Champhai College Graduation Day cum Freshers' Social, College Multipurpose Hall-a neihah chuan khuallian niin hun a hmanpui bakah Student Union-in an buatsaih College Annual Magazine 2014-2015 chu a tlangzarh bawk. Khuallian hi Champhai DC Pu H. Lalengmawia leh official dangten an tawiawm a ni.

Parliamentary Secretary chuan kumina Govt. Champhai College graduate zingah Mizoram University ranking a top ten a lang pha an awm chu lawmawm a tih thu a sawi a. Khawvela mithiam lar tak takte hi an taimakna leh tumruhna vang chauha hlawhtlinna nei an nih thu sawiin, mahni thiltih ah tuina tak tak neih a, rinawmna nen beih tang tang chuan kan tum ram kan thleng thei thin a ni, a ti a. Tun dinhmuna kan pass that leh thatlohna hi nakin hunah kan hlawhtlin emaw hlawhchhamna hriltu a nilo tiin khuallian chuan fresher leh graduate te chu an zir zelna turah inthlahdah miah lova bei zel turin a chah ni.

Champhai DC Pu H. Lalengmawia pawhin thu sawiin, zirlaite chuan college in thiamna tam tak a pek theih te chu hman tangkai nachang hre tura a duh thu a sawi a. Hlawhtling tura pachhiat lutuk emaw neih lutuk emaw a awm theilo a ni tiin, zirlaite chu lehkhabu chhiar uar turin a chah bawk a. Student Union-in Freshers' Social an buatsaih chu lawmawm tiin, college inrelbawlnaah pawh SU chuan mawhphurna thui tak an nei thin thu leh, hetianga inhman hian zirlaite ah 'all round development' a siam thu a tarlang a. Chutihrual chuan zirlai kan  nihna theihngilh a inhman a awm theih thu sawiin DC chuan engkim ah a chin tawk hriat zel a pawimawh a ni, a ti.

Champhai College Principal Pu Lalnunmawia chuan  Mizoram pum huapa Top ten a lang an college in an nei chu zirtirtute thawhhona that vang leh naupangte taimakna avang a ni a ti a, Naupangte chu taima lehzual a zir turin a fuih a, fresher lo lut thar te poh graduate hlawhtling tak ni turin college zirlai an nih chhunga taima taka zirturin turin a chah bawk.

Govt. Champhai College atang hian kumin a graduate zirlai 92 an awm a, an zingah hian Mizoram University top ten a inhlangkai thei zirlai pali an awm a ni. Vawiin hian NCC lama tithate hnenah lawmpuina hlan a ni bawk.