Geological Survey of India (GSI), New Delhi leh Disaster Management & Rehabilitation Department te tangkawpa huaihawt Department kaihhnawih hotu te puala Leimin chungchang zirhona chu vawiin khan Secretariat Conference Hall ah neih a ni.

Leimin zirhona Interactive Programme on Landslide Risk Management kaihruaitu Pu P.C.Lallawmsanga, Principal Secretary, DM&R chuan Mizoram chu leimin thlen fo na hmun a nih avang leh leimin tam tak chu mihring kut thlak vang a nih thin avangin ven theih a ni, a ti a. Chhiatna nasa tak thlentu a nih avangin mitin kan fimkhur a pawimawh a, uar taka kan inzirtir chhawn zel a tul tak zet a ni, a ti bawk. Leimin chungchang zirhona chu hman tangkai tum theuh turin department kaihhnawih hotu kalkhawm te chu a ngen bawk.

Pu B.M.Gairola, Director, GSI chuan leimin thlen thinna hmarchhak state hrang hrang te hnenah Leimin chungchang zirhona leh inhrilhhriatna programme neihpui tura an sawmna Mizoram-in chhanglet hmasa bera hmahruaitu an nih avangin lawmthu a sawi a. Khawtlang tana boruak muanawm leh him zawk siam a nih theih nan khuanu ruat leilung, boruak, sik leh sa inbuktawk chu tichhe zawnga tumah kan chet loh a pawimawh a ni, a ti. Leimin chungchanga hriat tur pawimawh, tih tur leh tih loh tur te mitinin kan hriat vek theih nan thingtlang kilkhawr thlenga mipui kan inzirtir uar deuh deuh a tul thu te a tarlang bawk. Pu Gairola hian GSI mawhphurhna leh hmalak dan te a sawifiah a, Pu Mriganka Ghatak, Supdt. Geologist, GSI leh Pu A.Elow, Geologist, GSI leh Mizoram Geologist ten Leimin chungchanga hriat tur pawimawh thupui hrang hrang te an sawifiahin sawihona te an hmang zui bawk a ni.

Vawiin Leimin zirhona ah hian department kaihhnawih hotu lu thahnem tak an tel a ni.