Vawiin khan Health Minister Pu Lal Thanzara hovin Chief Minister’s Conference Hall-ah Pre-Conception and Pre-Natal Diagnostic Techniques (PC&PNDT) Act, 1994 chungchanga Mizoram sorkar hmalakna thlirin State Supervisory Board an thu khawm.
PC&PNDT Act hi nu in nau a pai laia khawl hmanga naupai lai hmeichhia nge mipa a nih hriat tum khapna dan a ni a. Health Minister Pu Lal Thanzara chuan dan India ram hmundang te angin Mizoramah harsatna tling velo mahse hi India ram puma zawm ngei ngei tura tih a nih avangin tha taka kalpui a tul a. Danin tih leh tih loh tur a phut ang te awmze nei taka zawm a tul thu leh Central Inspection & Monitoring Team in Mizoram dinhmun a enfiah hunah pawh hmalakna chhuanawm tak entir tur kan neih theih tan la turin thawktute a sawm a ni.
He Act hnuaiah hian October, 2014 thleng khan India ram pumah case 607 ziah luh a ni tawh a, Convict 90 awm tawhin Doctor 64 zet medical license chhuhsak an ni.
India ram hmun dangah inneiha hmeichhe thuamchhawm (dowry) a hautak em avangin mi tam takin hmeichhe fa hrin an duh lova. Nau an pai laiin hmeichhia an ni tih an hriat lawk chuan thah mai duhna leh an lo pianchhuah tawh hnuah pawh tihhlum an tam em em a. Hei vang hian ram pumah sex ratio a hniam hle a ni. Chutihlaiin Mizoramah erawh hetiang thil kan tawn ve loh avangin sex ratio a sang hle a. 2011 chhiarpuiah khan mipa 1000 zelah hmeichhia 976 awm ang kan ni.
Meeting-ah hian State Commission for Women Chairperson Pi Vanlalawmpuii Chawngthu bakah Health Secretary Pu Lalhmingthanga, Social Welfare Department Secretary Pu Lalrinliana, Law Secretary Pu R.Thanga, MHIP Gen.Hqrs. Vice President Dr.Thanpuii leh mi pawimawh dangte an tel a ni.
