Vawiin hian Lawngtlai DC Conference Hall ah India Water Week, 2015 thupui : Our Water, Our Life (Kan Tui, Kan Nunna) tih hmangin nikhat awh Workshop buatsaih a ni a, mithiamte thusawi ngaihthlakna leh sawihona hun hman a ni.

Workshop kaihruaitu Addl. DC Pu R. Lalsangluaia, MCS chuan khawvelah tuihna a tlem tial tial a, tui nei turin tha leh zung, sum leh pai kan seng tam tial tial a, chuti chung chuan kan tui hmuh chhunte an thianghlim lo tial tial bawk. Hetiang zela khawvel a kal chuan kan tu leh fate tan chuan damkhawchhuah a harsa dawn hle a, ngaihthah thiang a ni tawh lova ni. Tui hnar ti chereutu chuan nunna hnar a suat a, a ti bawlhhlawhtu chuan tur a sem a ni. Chuvang chuan vawiinah ngei hian tui hna nghet a lo pun theih nan leh tui thianghlim kan neih theih nan mitin ten tihtur kan nei a ni tih kan inhriat thar a hun tawh a ni.  a ti.

He Workshop ah hian Pu K. Lalromawia, DCCF, LADC chuan tuihna humhim nana ramngaw tangkaina tih thupui hmangin thu a sawi a, Pu Lallawmpuia Vawthly, SDO, PHED chuan Water Week thupui “Kan Tui, Kan Nunna” tih thupui hmangin thu a sawi bawk. Heng mithiamte thusawi behchhan hian kalkhawmten tui pawimawhna leh a humhalh dan te, tui thianghlim kan neih reng theih nana mihringte mawhphurhna leh hmalak tulna tur chi nia hriatte sawi ho nghal a ni.

He Workshop ah hian Lawngtlai khaw chhunga Officer te, V/C te, Tlawmngai pawl hruaitu te, Chanchinbumite bakah Lawngtlai College zirlai naupang te leh school thlan bik atangin zirlai naupang te an kal khawm a ni.