Ni 2 chhung awh tur Mizoram Upa Pawl General Assembly Vawi 37 – na chu, vawiin a ni khatna ni Vanapa Hall-a neihah, Chief Minister Pu Lal Thanhawla chu Khuallian a ni.

 

 

Chief Minister chuan kan kum upat vang ringawta tar tum tur a nilo tiin, tangkai ber nih tum tlat zawk tur a ni a ti a. MUP chu sorkarin chhawr tangkai a tum dawn a ni a ti. Khawmpui Thupuia an neih, kangmei leh tichhe thei dang laka ramngaw humhalh tih leh Mizo Moral Reformation tih chu tha a tiin, lawmawm a tih thu a sawi a. Pu Hawla chuan sorkarin theihtawp a chhuah chung pawha kumina kangmei chhuak nasa lutuk chu pawi a tih thu sawiin, a chhan ni thei awma a rin, Zoram chhunga rawn pem ten eizawnna tur lo an neih nana ramngaw an hal vangte, mautam vanga mau ro kang mai thei tam tak a awm vang leh a leilung fate inthlahdah hrim hrim vangte nia a hriat thu a sawi a. Kan inthlahdah avang hian kan ram leilung fa nilo, mikhual ventham, inhlawhna nei thei vek tunah hian kan nei mek a, hei hi inbihchian nan leh hun lokal zel tura min tiharhtu ah i hmang ang u a ti.  

Kan khawtlang nun tlu chhe mek, tungding tur leh hnam anga kan din khawchhuah theih nan, Pu Hawla chuan sorkarin siam that duhna rilru a put ang pu ve a, thawk ho turin NGO te leh Kohhran zawng zawngte a sawm thu a sawi a. Sorkar chuan dikna lal tira, dikna, rinawmna, felna leh thianghlimna nen a kal chhoh dawn avangin, a kawngah pal thluk a nei anih pawhin tumahin insawipui theih a ni lovang a ti a. Hetah hian MUP chu hman tangkai sorkarin a tum ang a ti. NLUP chungchang sawiin, Chief Minister chuan sorkarin a ti hlawhtling dawn a, a rah chhawrtu turte chu a dawngtute an nih dawn avangin, rinawmna leh taimakna an mamawh hle dawn a ni a ti. Corruption nuaibo duhtute an fihlim hmasak theih nana anmahni vengtu tur Ethics Committee din chungchang sawilangin, thil la awm ngailo anih avangin, term of reference te siam chhoh mek anih thu a sawi a, tih zung zung theih a nilo a ti.

Pu Lal Thanhawla chuan inthlanna reng reng hi felfai tak, thianghlim leh zahawm taka neiha, kalphung tha tak nen kalpui atul thu sawiin, tunhnaia MHIP inthlanna neih takah erawh hetiang hi a tlakchham avangin, a chhuanawm lova, a zahawm lo a ni a ti a. MUP pawh imthlanna an neih turah, kan nu leh pa te awmkhawmna anih angin, zahawm tak leh entawn tlak taka inthlanna nei turin a duhsakna a hlan a ni.

Inkhawm hi MUP President Pu H.Raltawna’n kaihruaiin, kum 2008 – 2009  chhunga MUP member thi 1356 te sunna hun hman a ni a. An agenda pakhat ‘Corruption Do’ tih chu lungrual takin inkhawmah hian passed a ni. Tunah hian Mizoram chhungah Headquarter 1, Sub – Headquarters 6, Area 69, Unit 549 leh member singnga chuang an awm mek a ni. Kum 2009 – 2010 chhunga an budget tur chu Rs.16,47,178.00 a ni.

Vawiin chawhnu lamah Palai Upa Chawimawina hun hman a nih bakah agenda hlawm lian zual 8 an chhawpchhuahte chu sawiho nghal a ni a. Naktuk ah Hruaitu thar thlanna neih a ni ang.