Mizoram University leh Indian Council of Social Science Research (ICSSR) bul tuma Department of Political Science buatsaih, Seminar on Grassroots Democracy - The Relevance of Local Self-Government in Mizoram  chu vawiin khan Dean’s Conference Hall, School of Social Sciences, Mizoram University ah Education Minister Pu Lalsawta’n a hawng a. He Seminar hian ni hnih a awh ang.

 

 

Hawnna inkhawmah thu sawiin Pu Lalsawta chuan Mizoramin kum tam tak Village Council hmanga tualchhung ro inrelna a lo kalpui tawh a; tunah hian Municipality nei turin a inbuatsaih mek a ni, a ti a. Ram rorelna a mipui ten chanvo tam zawk an neihna turin tualchhung sorkar te kutah thuneihna tam zawk pek a ngai a; political party hrang hrang ten an party manifesto ah thuneihna semzai hi aupui thin mah se, rei tak chhung kalphunga lo neih tawh thlak danglam hi a harsa thin a ni ang, thuneihna semzai zawngin an kal thei mai thin lova; chu chu thlak danglam a tul a ni, a ti a. Kalphung siamtha turin tun sorkar chuan hma a la dawn a ni, a ti.

Pu Lalsawta chuan tualchhung sorkar hnena thuneihna sang zawk pek chu democracy hlawhtlinna a nih avangin a pawimawh a, hemi rual hian thuneihna  chu mawhphurhna nen a kal kawp tlat tih sawiin tualchhung sorkar hnena thuneihna pek a nih dawn chuan anni pawhin an mawhphurhna (accountability)an hre chiang tur a ni, a ti a. Mizoram dinhmun siamtha tura sorkar hmalakna pawimawh zingah zirna siamtha turin Education Reforms Commission chu hun reilo tea din a nih tur thu tarlangin Pu Lalsawta chuan hemi kawnga sorkar hmalakna ah hian University mithiamte chu rawtna tangkai tak tak nei turin a beisei tih a sawi bawk.

Seminar hawnna inkhawm hi Prof. J.K.Patnaik, Dean, School of Social Sciences in a kaihruai a. Khualzahawm, Prof.A.N.Rai, Vice Chancellor, MZU pawhin thu sawiin thuneihna insemzai chungchanga tun thlenga India kalphung chu British hun laia tihdan hlui kan chhawm a ni, a ti a. Tualchhung sorkar te pawh thuneihna sang zawk keng tur chuan a mawhphurhna ken tel an hriat chian a  tul hle a ni, a ti.

Seminar hawnna inkhawm hi technical session a chhunzawm a ni a. Vawiin technical session ah chuan Local Self-Government in Mizoram : Issues and Challenges; Comparative Study between 73rd Amendment and Village Council; Tradition of Grassroots Democracy among Tribes of N.E.India and Some Reflection on Village Council in Mizoram; An Appraisal of Local Self-Government in Mizoram leh Concept and Dimenstions of Grassroots Democracy : Social Work Intervention tih thupuite hmanga mithiamte paper present sawiho a ni.