Israel atanga Mizoram rawn tlawhtu SHAVEI ISRAEL ORGANISATION hruaitu te chuan Tourism Minister Pu S.Hiato chu a chenna in Tuikhuahtlangah ni 18.4.2009 (Sat) zan khan tlawhin an kawm nghal a. Heng Israel Sakhaw hruaitu te hian Mizorama an mi leh saten zalen taka sakhua an biak theih avanga lawmawm an tih thu Minister an hrilh a, hun lo kal zelah Israel leh ram dang atanga Mizoram rawn tlawhtu pawh an pun chhoh zel an beisei thu an sawi bawk a ni. Minister chuan Isua Krista ringtu an nih avanga Mizo mipui ten Israel leh Ram Thianghlim an ngainat thu hrilhin thalaite leh sakhaw hruaitu te tan pawh Ram Thianghlim fanna programme ruahman dun tha a tih thu a sawi a. Hun lo kal zelah cultural exchange programme te pawh ruahman tha a tih thu pawh amah tlawhtu Israel sakhaw hruaitu te hi a hrilh bawk a ni. Mizoram rawn tlawh dawna harsatna an nei anih pawhin sawrkar chuan theihtawp chhuahpui a tum zel dawn ani tih a hrilh nghal bawk.

Tourism Minister rawn tlawhtu te hi - Ha Rab Eliyahu, Birnbaum Rabi, Michael Freund founder and chairman Shavei Israel Organisation te leh Tzvi Khaute, Coordinator - Bnei Menashe Department te an ni.