1533/2022-2023
Aizawl, 10.08.2022: Myanmar atanga Mizorama raltlan hmun hrang hranga awmte chhawmdawlna tur medical bungrua hrang hrang Project-Mizoram '22 (Covid-19 Relief Medical Equipment/Supplies) hnuaia chah chhuah chu BN Hospital & Research Centre hnena hlanchhawnna vawiin khan Hotel Floria Roof Top, Dawrpuiah MSU Gen. Hqrs. chuan a buatsaih. Chief Minister Pu Zoramthanga chu he hunah hian khuallian a ni.

Chief Minister Pu Zoramthanga chuan hun engemawzat Project Mizoram hlawhtlinna atan MSU te, USA lama atanga thawhpui te leh mi dang dangin theihtawp an chhuah hnu ah vawiina bungraw hlanchhawnna neih a ni ta chu lawmawm a tih thu a sawi a. An hmalakna zawng zawng chu fakawm a ti a. Heng bungruate hi a mamawhtu ten tangkai taka an hman nan theihtawpin hma la chhunzawm a, he hmalakna hlawhtlinna a lo lan belh zel a beisei thu a sawi. Chief Minister chuan bungraw chahtu te'n an bungraw chah chu medical thil a nih avanga a dawngthleng tur (consignee) atan hospital an awm a tul avanga inhawng taka BN Hospital chuan consignee nih an lo inhuam chu lawmawm a tih thu a sawi bawk.

Chief Minister chuan India ram chu raltlan te lo dawngsawng thei tur ram signatory a nih ve loh avanga he hmalakna pawh hian harsatna a tawh phah a sawi a. Myanmar atanga raltlan te chu sawrkar laipui chuan an lo luh remti lo in, kir tir leh tur tiin thuchhuah a siam a, chutianga sawrkar laipuiin thu a chhuah tawh chuan state tan pawhin zawm loh ngam pawh a ni lo tur chu a nih rualin, Mizoram chuan Legislative Assembly House ah a puih zel tur thu a declare tak thu a sawi.

Vawiin programme-ah hian MRRC-M Chairman Pu Vanlalchhana, Project Cure/R2PM ami Pu Philip Htoon leh MSU GS Pu Samuel Zoramthanpuia te hnen atangin report ngaihthlak a ni a.

Project Mizoram hi Mizoram a Burma unau raltlan awm te leh Mizo mipuite puala Covid-19 pual a medical equipment a thlawna sem chhuak tura project kalpui a nih dan te, khawvela medical equipment sem chhuaktu lian Project C.U.R.E. (Commission on Urgent Relief and Equipment), Denver, Colorado a innghat te leh Myanmar Refugee Relief Committee- Mizoram, R2P Myanmar Way, BN Hospital & Research Centre Mizoram, Arizona Falama Christian Church, Chin Baptist Association, North America te nena he project hi kalpui a ni dan te report ah hian ngaihthlak a ni. Tuna container hmasa bera damdawi bungrua lo thleng hi India pawisa chuan nuai 300 chuang hu man hu a ni.

Ex- Chief Minister, Chin State Salai lian Luai, MSU Senior Adviser Pu K. Biakthianhlima leh MSU President Pu J. Lalmuanzuala te pawhin thu an sawi a. Medical bungrua te hi camp a dah theih thil a awm laiin technician te khawih ngai a nih avangin raltlante awmna district hrang hranga hospitalah te dah tum a nih thu sawi a ni. Programme hi Rev. Ngun Siang Lua, LCF chuan a bultanna hmangin Pastor Thang Moi chuan lawmthu sawiin hun a khar a ni.