1534/2022-2023
Aizawl, the 10th August 2022 : Home Minister Pu Lalchamliana, Disaster Management & Rehabilitation changtu Minister ni bawk chuan chawhnu dar 2:00 pm khan Zero Point MINECO atangin Disaster Management & Rehabilitation Department hnuaia State Emergency Operation Centre (SEOC) leh District tin Disaster Management Authority a District Emergency Operation Centre (DEOC) ten rikrum thil leh chhiatrupnaa a thlen thula a tula an hman turin Emergency Response Vehicle ERV (Mahindra Bolero Camper) sawmpahnih (12) a vai liam.

Pu Lalchamliana chuan tunhnaiah Mizoramah leimin leh road accident vangtein chhiatna hrang hrang a thleng a, a tuartute a tawrhpui zia a sawi a. Leimin tam zawk hi chu mihringin leilung kan tih danglam vanga thleng nia a lan thu sawiin hmasawnna leh kan nitin mamawh atana kan chet chhuahnaah te mahni chhiatna inthlen lo tura fimkhur tlan a pawimawh zia a sawi a. Tun hnaiah State Sawrkarin Disaster Mitigation Fund hnuaiah chhiatna thleng thei hrang hrang venna atan hna thawh tur Rs. Nuai 780 vel a ruahman tawh a, SEC in a pawm tawh a ni tih a sawi bawk.

15th Finance Commission hian disaster a kan hman turte tha thawkhat takin ruahmnna min siam sak a, SDRMF tiin kuminah cheng vaibelchhe 45 vel hmu turah kan in beisei a. Kaihhruaina fel tak siamin pawisa hman dan tur min siam sak a ni, a ti Home Minister chuan. DM&R hi department lian a nih loh avangin DDMA staff tlemte leh kan State Disaster Response Force te bakah kan tlawmngai pawl YMA te hi che hmasa an ni thin tiin Aapda Mitra Volunteers training hmang tein YMA member te training pe thin thu a sawi bawk. DM&R Minister cuan tlawmngai pawlte thawhpui zelah a sawm a, a theih anga thuam that zel pawh sawrkarin a duh a ni, a ti a. Heng ERV motor te hi dik leh tangkai taka hmang turin DDMA te a chah a ni.

Central atanga pawisa dawn State Disaster Response Fund pung tling khawm atangin heng ERV te hi lei a ni a. July 1, 2021 khan Minister, Disaster Management & Rehabilitation hian Mizoram Fire & Emergency Service thuamchak nan Kangthelh motor tha chi High Pressure Pump Fire Tender lirthei 3 (pathum) zet a lo hlan tawh a. Mizoram a Tlawmngai pawl lian Central Young Mizo Association hnenah pawh Ni 22 July, 2020 khan Emergency Response Vehicle 1 (pakhat) hlan a lo ni tawh bawk a ni.

Flag off hun hi Pu Benjamin Lalzama, Director, DM&R in kaihruaiin DM&R official te leh District hrang hranga DDMA khaipate an tel a ni.