Mizoram Youth Commission (MYC) buatsaih Youth Summit & Road Show 2018 chu district capital hrang hranga hman a nih hnuah a tawpna ber turin vawiin khan Lunglei ah Chief Minister Pu Lal Thanhawla chuan a hawng. Chief Minister hian MYC Incentive Cash Award Scheme, college exam a Gold Medalist-te leh UPSC leh sorkar laipui hnuaia competitive exam hrang hranga inziak tlingte hnena pek chu a sem nghal a; MYC Chairman Pu Joseph Lalhimpuia chuan Lunglei District chhunga kumin HSLC leh HSSLC topper pathum hnenah lawmpuina MYC in a buatsaih chu a hlan bawk. Lunglei Youth Summit & Road Show hian ni hnih chhung a awh ang.

Chief Minister chuan Mizoram hmun hrang hranga thalaiten MYC hmalakna an hmelhriat a, Skill Development lama thalaite hmasawnna tur thil tul chi hrang hrang inhrilh hriatna hun remchang leh, lehkha zirna leh eizawnna tur thlenga kawng inkawhhmuhna hun buatsaih a ni chu lawmawm a tih thu sawiin, "Youth Summit hi a hlawhtlinna chu tlawhtu tam lamah chauh nilovin, a chhimtuten an kal zel naah, an zirna leh eizawnna atan an hman tangkai zel danah a innghat dawn a ni" a ti. Chief Minister chuan Mizoramin hmasawnna kawng a zawhnaah innghahna tha leh hnianghnar tak a neih chu "human resource" a ni tiin, Mizoramah hna thawk rual awm zingah a tam zawk chu thalai annih leh zel avangin thalaiten hma an sawn theih nan thalaite khawvel siam hmang chu sawrkar pawhin a ngaihpawimawh thu a sawi a. Games and sports lamah chuan infrastructure tha tak tak lo siam tawh niin hman tangkaitu pawh an tamin, infiammi chhuanawm leh thleng sang tak tak Mizoramin a neih thu a sawi a. Zirna lamah pawh khawvel el phak quality education siam tumin kawng hrang hrangah hmalak tawh niin, hmalak mek zel a nih thu te a sawi bawk a. Chutiang bawk chuan skill development lamah MYC kaltlangin chak taka hma lak a ni, a ti a.

Chief Minister chuan Mizoram chu India leh Asia chhim thlang ramte inkara insumdawntawnna atana luhka pawimawh tak a nih thu tarlangin, Mizoram economy tan hmasawnna thlen theitu tha tak a nih thu a sawi a. Chung chuan a ken tel tur chu state pawn leh ram pawn thlenga awlsam zawka thalaite tan inzarpharhna tur a nih avangin zau zawka rilru pawh inhawn a tul thu a sawi a ni. Ramin hma a sawn chho zel in, hmasawn hna ngawrh taka thawh mek zel a nih laiin mithiam, thiam bik nei thawk tur a lian atanga a te ber ramin a mamawh thu te, chung hmasawn hna hrang hrang thawk thei tur mahni theihna, capacity insiama kan inzirtir a pawimawh hle thu a sawi a. Thalaite tangkaina tur a nih pawh chuan sorkar pawhin commission-ah sum an mamawh ang chu a dah zel tum a nih thu a sawi bawk.

MYC Chairman Pu Joseph Lalhimpuia chuan thalaite ngaihsak annih a, an hmakhua thlir chunga Youth Summit & Road Show chu buatsaih a nih thu a sawi a. Thalaite tan khawvel thar siamnaah thalaite khawvel zauh a ngai tih hriain MYC chuan tunah hian kawng hrang hrangin hma a la a ni, tiin MYC Chairman chuan Chung zingah chuan Central IAS Online Coaching leh SSC Coaching siam a nih thu te, thalaite tana mi entawntlak leh entawntur thlanchhuah a Young Achiever Award buatsaih a nih tur thu te, Incentive Award atan cheng nuai 33 dah a nih thu te, kohhrana thalai pawl hruaitute tan India rama kohhran hmun pawimawh hrang hrangte tlawh theih nan exposure visit programme siam tum a nih thu te, Mizoram mawina leh hlutna khawvel hmuh a phochhuah a, tourism tihmasawntu a lo nih theih nan photographer te nen tangkawpa hmalak tum a nih thu te a sawi. Tuna Airforce Commando lak turah diltu mi 3000 chuang zingiah MYC chuan dil ve turin Mizo thalai 19 tir ve in, mi 85 an lak zingah Mizo thalai 2 an tel thu te, Medical Test la hmabak a nih thu te leh, Indian Army-a Chaplain post ruak Mizo in an hnawhkhat theih nan hmalak tum mek a nih thu te a tarlang bawk a. Pu Joseph Lalhimpuia chuan thalaiten Youth Summit & Road Show chu an hman tangkai a, tumruhna nen hlawhtlinna an hmuh a duhsak thu a sawi a ni.

MYC Youth Summit & Road Show 2018 hi Skill Development leh Youth Affairs lama hmalâkna neiho Mizoram sawrkâr Department hrang hrang eng emaw zât bâkah Private Agency/Firm eng emaw zât nên thawk hoin stall te hawngin a ngaihventute tan counseling te neiin, thenkhatin an thil siamchhuahte an hralh bawk a; Lungleiah hian Stall 51 hawn a ni.

Vawiina Lunglei Youth Summit & Road Show hawnna inkhawm hi Lunglei DC Dr. Ankita Chakravarty chuan kaihruaiin, Lalngilneii Lianhlawng, University of Sussex, United Kingdom a zir mek chuan zirlai kalkhawmte fuihna leh ram pawn a zirna chhunzawm duhte tan hriat tur tul a sawi a; Pu Lalramthianghlima, DEO chuan lawmthu sawiin hun a khar a ni. Khuallian Chief Minister hi Pi Lal Riliani, President, Indian Society on Tobacco & Health: Mizoram Chapter chuan a tawiawm a ni.

Youth Summit hi April ni 17 khan Aizawlah bultan niin, April 24 ah Kolasib neih leh a ni a; April 27 khan Mamit ah buatsain niin, May ni 4 ah Champhai ah, May ni 9 ah Serchhipah, May ni 15 ah Siaha hman leh niin May ni 18 khan Lawngtlai ah hman leh ni a. Lunglei hi a tawpna tur a ni.