Vawiin khan Mizoram Start Up Movement chungchangah Mizoram Governor Lt. Gen. Nirbhay Sharma PVSM, UYSM, AVSM, VSM (Retd.) kaihhruaiin Raj Bhavan-ah meeting neih a ni a. May ni 11, 2018-a thurel bawhzuinate an thlirho a ni. 

He meeting-ah hian sawrkar hotute chuan zirna in sang zawkte chu tlawh kualin, an dinhmun te zirchianna neih a nih thu tarlan a ni a. Mahni kutkawiha eizawn tumte tana bultanna tur hmuh sak leh project hlawhtling ngei tura an hriat ah chuan bank te’n sum an pek duh nan sawrkar inrawlh pawimawh an tih thu an sawi a ni. Heng bakah hian entrepreneur-te mamawh consultancy leh research tihna tur Centre din tha an tih thu an sawi a, central ministry atangte a sum dap chhuah dan ngaihtuah nise an ti bawk. 

Planning Secretary Dr. C. Vanlalramsanga chuan NEDP hnuaia Entreprenurship Development Scheme (EDS) hmalaknate presentation hmangin a tarlang a. Start-Up India atangin mithiam rualte EDS zirchiang tura an rawn kal thu sawiin, state dangte entawn tura inpholanna remchang siamsak an tum thu a sawi a ni.