Ni hnih chhung awh tur, Mizoram University (MZU) leh UNCTAD – MOIC – DFID Project te tnagkawp ina buatsaih, International Seminar on Exploring ASEAN Market for India’s North East Products tih, vawiina MZU Conference Hall, Tanhril a neih chu Chief Minister Pu Lal Thanhawla’n a hawng.

 

Chief Minister chuan hetiang programme pawimawh tak buatsaih a ni chu Mizoram tan thil vanneihthlak tak a ni a ti a. India Hmarchhak (NER) hian ramdang nen ramri 98% a tawmpui a; hei vang hian hmakhawsang atang tawhin, insumdawn tawnna mai bakah khawtlang nun thlengin kan inpawh hle a ni a ti a. India leh ASEAN ( Association of South East Asian Nation ) ramte insumdawn tawnna hi NER kaltlang hian hlawkna tam tak a hmu thei a ni a ti. Thil kan thawnchhuah ve theih awm, Agri – Horticulture lam thilte, handicrafts leh handloom lama kan dehchhuah tam takte hi ASEAN market-ah hian a thawnchhuahna a inhawng zau hle a ni a ti a. India Hmarchhak bial mipui chengte leh a ramin insumdawn tawnna atanga hlawkna tak tak kan hmuh ve theih nan thil siamna hmunpui leh a ruhrel dangte din a tul a ni a ti.

Pu Lal Thanhawla chuan helai bialin ramdanga a thawnchhuah theih tur agriculture leh allied sector atangte, handloom leh handicrafts bakah tourism, education leh health care lama kan hausakna te hi chawikangin, Agriculture Export Zone Mizoramah leh Meghalaya ah te tal din a tul thu a sawi a. Heng tipuitling tur hian Look East Policy hmanna kawngah a leilung fate hman tangkai a pawimawh em em dawn a ni a ti. Thil reng reng tipuitling tur chuan a leilung fa ten a awmzia an hriat hi a tul hmasa ber fo a ni a ti bawk.

Chief Minister chuan chak taka kawng engkima hma kan sawn chhoh hi a pawimawh a ni tih sawiin, Mizoram University nen pawh thawhho chhoh zel a inhuam thu leh intanpui theihna ah sorkar chu a inhawng reng a ni a ti.

ASEAN hi Asia ram 10 inzawmkhawm a ni a: Brunnei Darrussalam, Cambodia, Laos, Indonesia, Malayasia, Myanmar, Phillipines, Singapore, Thailand leh Vietnam te an ni a. Seminar-ah hian heng ramah te hian eng bungrua leh servicete nge an duh zawng kan neih te tih zirhona leh tun kan dinhmun leh hmabak awm thei te an sawiho a ni. Seminar-ah hian USA atangte, Bhutan leh India ram chhung atangte in IIM (Ahmedabad ), Indian Institute of Foreign Trada (IIFT), New Delhi, CUTS International Jaipur), IIT (Guwahati) leh India ram college hrang hrang atangte in mithiam an rawn tel a ni.

Seminar hawnna inkhawm hi Prof. Lianzela’n a kaihruai a. MZU Vice Chancellor Prof. A.N.Rai leh Dr.Shahid Ahmed, UNCTAD India, New Delhi ten thusawina hun an hmang bawk a ni.

Chief Minister hian seminar-a rawn telte pualin State Guest House-ah zanriah a buatsaih sak a ni.