Mizoram sorkar Cabinet Minister Pu Zodintluanga chuan vawiin chawhnu khan a department enkawl zing ami I & PR Directorate tlawhin officers te nen an hna kalphung leh harsatna an neih mekte inpawh takin a sawipui a, Parliamentary Pu S. Laldingliana’n a tawiawm a ni.

Minister leh Parliamentary Secretary te hian office chhung chipchiar taka fangin thawktu zawng zawngte hmelhriat tir an ni a. Director Pu L.R. Sailo office-ah officers te nen inpawh taka inkawmna hun hmang zuiin hetah hian Minister chuan mimal, pawl ho leh department anga harsatna an neihte chu englai pawhin ngaihthlak an inhuam thu te, amah leh a Parliamentary Secretary pawh eng hunah pawh hmuha biak theih annih tur thu te, chumi atana rawngbawl tura office luah an nih dan te I&PR officer-te chu a hrilh a ni.

I & PR Department hian nitina an hnathawh kalphungah sorkar mipawimawh zual VIP te kawng hrang hranga tawiawmna ah indaih loh chang an neih thin dan te, an chettlatna ber pakhat lirthei lama an indaih loh dan te Minister hi an lo hrilh a. VIP hnungzui tur an pun tak avang leh an veivahna pawh a ni tel a a lo pun tak avangin anmahni tawiawm tur officers leh thlalatute indaih loh chang a awm dante chipchiar takin an lo hriattir bawk a. Tualchhung chanchinbu te tana advertisement an pekchhuah dante pawh ennawna siamthat ngai lai siam that a tul tawh dan te, advertisement pekchhuah kawnga rual taka kal an duh laia deptt. dang atanga harsatna engeng emaw a pian theih dante pawh Minister leh Parliamentary Secretary te hi an lo sawipui a ni.

Heng zawng zawng hi Minister leh amah tawiawmtute chuan uluk taka ngaithlain a sutkian dan tur la sawiho zel nise an ti.