2657/2025-2026

Aizawl the 15th December 2025: Vawiin khan National Bank for Agricultural & Rural Development (NABARD) Mizoram Regional Office chuan Assembly Conference Hall-ah State Credit Seminar 2026 - 27 an buatsaih a, Chief Minister Pu Lalduhoma'n a telpui.

Chief Minister hian State Focus Paper 2026-27 a tlangzarh a, thu a sawi nghal a. NABARD kal tlangin sorkar chuan hmasawnna hna tam tak a thawk thin a. Ram hmasawnna ke pen tichaktu pawimawh a ni. NABARD kaltlanga hmalak theihna hi kan ngah hle.

Kan hmalak tawh chinah pawh kan tluang hle. NABARD sum hmanga din Megawatt 10 pe chhuak thei Thenzawl Solar Power Plant chu kan hawng dawn hnai a, Megawatt 5 pe chhuak thei dang pawh Sumsuih ramah kan thawk leh dawn a. Chief Minister Rubber Missions pawh chak taka kalpui niin nikum chhung khan Rubber kung nuaih li leh singnga kan phun hman a. Kuminah a dang nuaih sawmpakhat singnga leh sangriat phun leh kan tum.

Tun hnaia NITI Aayog Sustainable Development Index report thar bera kan dinhmun that dan khan kan hmalaknaten rah tha an chhuah zel a ni tih min hrilh a ni, a ti. Kan lo tarlan tawh angin NITI Aayog Sustainable Development Index thar berah hmarchhakah Hnahthial district chu pakhat niin Champhai chu pahnihna an ni a. Kolasib district chu pakuana a ni.

Pu Lalduhoma chuan, kan ram mipui zaa sawmriat deuh thawte hi lo neia eizawng an la nih avangin heng mite chawikan hi kan ram chawikanna a ni a. Kan bankte hi thingtlang mipuite ban phaka an inchhawp chhuah a ngai. Tunah hian Mizoramah bank branch 278 kan nei mek a, an zinga 180 hi Aizawl, Lunglei leh Kolasib district-ah te an awm a, district dang pariatte hian branch 95 an intawm mek a, zau zawka lo inzarpharh turin ka ngen a ni, a ti bawk.

Pu Khilli Ram Meena, Chief Secretary chuan keynote address sawiin, sector hrang hranga NABARD kaltlanga Mizoram sorkar hnathawhte leh hmabak la awm te a tarlang a. Seminar fel fai tak an buatsaih avanga an chungah lawmthu a sawi a ni.

Pi Ramdinliani, Secretary, Agriculture & Farmera Welfare pawhin thusawina hun a hmang a, kalkhawmten sawihona hun an hmang zui leh a ni.

Pi Pankaja Borah, General Manager, NABARD chuan kal khawmte lawmna thu a sawi a, Pu Lalrokunga Chhakchhuak, Deputy General Manager chuan State Focus Paper 2026-27 sawifiahna a nei a ni.

State Focus Paper 2026-27 hian Priority Sectors-a hmalakna tur sum ruahman (projection) Rs. 4349.71 Crore a siam a. Agriculture leh a kaihhnawih lamah Rs. 2260.99 Crore dah a ni a, MSME lamah Rs. 1500.35 Crore ruahman a ni a, Export credit-ah Rs. 6.55 Crore, Education-ah Rs. 18.51 Crore, Housing Sector-ah Rs. 432. 35 Crore, Social Infrastructure-ah Rs. 36.30 Crore, Renewable Energy ah Rs. 24.67 Crore leh thil dangah Rs. 70 Crore te ruahman a ni.