420/2025-2026

Aizawl, the 1st May 2025: Vawiin khan CM Conference Hall-ah Chief Minister Pu Lalduhoma leh Mizoram tlawha lo zin mek National Commission for Scheduled Tribes (NCST) te an inkawm.

Chief Minister hian, NCST chairman leh member ten kokim taka Mizoram an rawn tlawh avangin lawmthu a lo hrilh a. State Review Meeting an buatsaih te, Autonomous District Council an tlawh te chuan Mizoram tan rah tha a chhuah ngei ka beisei, a ti. Chief Minister chuan, kan ADCs ten hmasawnna hna tam zawk an thawh theih nan budget pangai bakah hian Additional Fund hi central sawrkar hian min siamsak thei se kan duh a. Union Minister of Minority Affairs bulah pawh ka sawi tawh thin a ni.

Tunah hian Working Women Hostel paruk kan sa mek a, Women College hi kan inkawmna behchhan hian central sawrkarah project te siam ila a that ka ring. Ruihhlo tawlhrukna hluar chho do turin Coordination Committee chak tak kan din a, kan bei zel dawn a ni. Hindi Education hi kan ngaipawimawh a, zirnaah three language formula hi kalpui theih tha kan ti, tiin Comnission ngaihpawimawh thila Mizoram sawrkar hmalakna tlangpui a lo hrilh.

Commission member te hian Mizoram sawrkarin a lo dawnsawn danah lawmthu an sawi a. An ngaihpawimawh thil hrang hrang te Chief Minister hnenah hian thlenin, a tulna apiangah Mizoram sawrkar tanpui tura an inpeih thu an hrilh a. Delhi lama a zin leh hunah Commission tlawh ve ngei turin an sawm bawk.

NCST hi an Chairman Pu Antar Singh Arya chuan an rawn ho va, Commission member Pu Nirupam Chakma, Dr. Asha Lakra leh Pu Jatothu Hussain te pawh an rawn tel vek a, Commission Secretary Pu Puneet Kumar Goel leh official pawimawh te an tel bawk.

Commission hian Mizorama Autonomous District Council te an tlawh kual hnuah nimin khan Secretariat Conference Hall-ah State Review Meeting an nei a, nizanah Chief Minister hian Aijal Club ah an pualin zanriah a buatsaih bawk.