India ram puma 1st National Handloom Day hman anih rualin Mizoramah pawh vawiin khan Mizoram Legislative Assembly Annexe Basement I ah Chief Minister Pu Lal Thanhawla chuan a hawng.

Chief Minister chuan National Handloom Day hmasa ber hman a ni chu industry hnathawktute thahnemngaihna vang a ni tiin, lawmawm a tih thu a sawi a. Handloom sector hi agriculture tih lohah chuan chhawrtu tam berna a ni tiin, Mizote hi a hmang uar ber awm tak kan ni a ti a. Chief Minister chuan National Handloom Day hi India in zalenna a sual laia ram dang siam nilo, mahni ram siam chhuah chauh hmang tura an kalpui, ‘Swadeshi Movement’ bul tanna ni, ni 7 August 1905 hriatrengna ni atan Central sorkarin ram pumah hmang tura a ruat a ni a ti a. Tunah hian Prime Minister pawhin ‘make in India’ tiin a rawn kalpui tan mek a ni Pu Hawla chuan a ti.

Chief Minister chuan central sorkarin ei leh bar bakah silh leh fen a ngaihpawimawh thu a sawi a. Agriculture leh Handloom Sector ah hnathawktu an tam ber a ni a ti a. Mizoramah chuan UT kan nih atanga kalpui tawh kan nih thu a sawi a. Kan puan design mawi tak tak, Mizo puan kan tihte hi hnamdangin anmahni ta ang a chhala, min chhuhsak lohna turin neitu nihna kan hauh tlat theihna turin ‘Patent’ vat a ngai a ni Pu Hawla chuan a ti a. Hmasawnna dang kan hmuh chhohte pawh hi kan humhalh a tul a ni a ti. Kan puan mawi tak takte hi khawvelah Mizote min pholang tu leh min ti hmingtha theitu a ni tiin, Chief Minister chuan kan puantah te hi quality tha thei ang ber leh mi te hip thei tura a rawng design thlenga uluk a pawimawh a ni a ti a. Puantah hi hmeichhiate tihtur bik a nilo tiin, mipate pawhin kan thawh theih a ni a ti. Chuvangin kan hnathawh theuhte hi Pathianin a rawngbawl tura min dahna a ni tih hria a, rinawmna, dikna leh taimakna nen tui taka thawk tur kan ni a ti a. Kan thlenna chin atang zelin ngaihtuahna thar leh tha zawk dap chung zelin, midangte malsawmna ni turin hmasawn zel kan tum tur a ni a ti.

Chief Minister hian puantahtute inthlunkhawmna cooperative society hrang hrangte hnenah 10% rebate cheque a hlan bawk a ni.

Khualzahawm Pu H.Rohluna, Minister for Industries chuan Handloom sector atan Plan 11-na chhungin Rs.90 Crore central sorkar atanga haichhuah a nih thu a sawi a. Heng bakah trainingna hmun tur Cluster Development Project 17 din turte, Integrated Development Scheme, Weavers Service Centre leh Apparel & Garment Production Centre din tur chungchangte a sawilang bawk a ni.

Parliamentary Secretary Pu Joseph Lalhimpuia chuan India ram GDP ah Handloom Sectorin 4% a thawhchhuah thu sawiin, rampumah mi 190 lakhs hnathawk an awm a ni a ti a, chuta 60% chu hmeichhia an ni a ti. Mizoramah chuan Handloom hi industry hlawhtling ber anih thu a sawilang bawk.

National Handloom Day hi Industries Departmenta Weaver Service Centre leh Development Commissioner, Handloom office, Ministry of Textile, Govt. of India tangkawpina buatsaih a ni a. Hawnna inkhawm hi Pu Zothankhuma, Commissioner & Secretary, Govt of Mizoramin a kaihruai a ni.

National Handloom Day hi nilenga hman niin, chawhnu lamah technical workshop neih a ni a. He ni denchhen hian ni hnih chhung handloom exhibition neih a ni bawk ang.