Vawiin khan Govt. Johnson College chuan University Grants Commission-in Swachh Bharat Abhiyan atana hma la tura a hriattirna bawhzuiin nilengin Faina Hnatlangpui an huaihawt a. He Hnatlangpui hi Pu K. S. Thanga, Parliamentary Secretary, i/c. Finance, Planning, etc., chuan hawngin hun engemaw chen chu hnatlangah hian hnathawh kawr nen a thawk zui ve nghe nghe a ni.

Hawnna thu sawiin Pu K. S. Thanga chuan Clean India Mission hi ram pum huap faina campaign a nih thu leh ram pum huapa faina campaign lian ber a nih thu a sawi a. He campaign-ah hian sorkar hnathawk ringawt pawh maktaduai 3 vel zet leh college leh university zirlai thahnem tak an tel thu a tarlang bawk a. Mizorama kalpui a nih dan sawiin Urban Mission hi Mizoramah chuan UD&PA Department-in a kalpui laiin Rural Mission erawh PHE Department-in a kalpui tih a sawi a. Zirna in lam kaihhnawih Mission chu School Education Department-in a kalpui thu a sawi bawk.

Pu K.S. Thanga chuan he Mission hi Mizoram sorkar pawhin nasa taka a beih meka nih avangin zirtirtute leh zirlai kalkhawm zawng zawng chu mahni tan vek a ni tih hria a he Mission atana theihtawp chhuah tur hian a sawm a. Ram hmel tidanglam hial thei tur Mission a nih avangin neitu rilru pu taka mahni theihna zawn theuhvah sorkar hmalakna thlawp theuh turin a ngen bawk ni.

Govt. Johnson College hian Swachh Bharat Abhiyan bawhzuina atan zirlaite tan Cleanliness Awareness Lecture vawikhatna an lo buatsaih tawh a. Lecture hi kuminah vawihnih la huaihawt leh an tum a ni.