Chief Minister hi Kolasib Circuit House ah district hruaituten lo dawngsawngin khawtlang hruaitute leh PWD hotute leh contractor te nen National Highway kawng siamthat hna kal mek leh hmachhawp chungchang chirpchiar taka sawiho a ni.

Buichali leh Khamrang inkar kawng siam that hna, Ratna company hnuaia thawh tum mek chungchangah hian PWD hotute chuan tender koh dan phung sawrkar laipuiin an thlak leh thin avangin thawk turin inring vek tawh mahse hmalakna a thuanawp leh tak thu an sawi a. Hna thawh dawn chuan kawng leh leilung dinhmun tehna, Network Survey Vehicle hman ngei sawrkar laipuiin a phut avangin leh, he survey vehicle hi India hmarchhak ah tun dinhmunah hman hawh mai tur a awm rihloh avangin harsatna tawh a ni a. Hemi tello a hmalak phalsak mai tura Chief Minister in sawrkar laipui a zuk nawr hnu ah hmanni lawk khan phalna hmuh a ni ta a. Amaherawhchu hnathawktu tur labourer te tunlai hrileng avang hian an lo haw hman tawh avangin duh angin hma an la leh thei ta rihlo tih an sawi. Khamrang leh Kawnpui inkar pawh kawng siam turin tendering process kalpui mek niin, sawrkar laipui thu ngaihchan mek a ni bawk a.

Helai kawng siam leh maintain hna hi central lam kut ni mahse mamawhna a nasat em avangin state PWD in theihtawp chhuahin a chhe zualpui lai chu temporary a thawm that hna an thawk char char rih a ni.

Bairabi rel chawlhmun panna kawng, railway approach road chu tun hnaiah a chhiat leh tawh avangin rel a buhfai lo thleng te kudam a phur lut turin truck lian full load an kal leh thuai theih nan chak taka hma lak theih dan tur te, hmanrua lak dan tur leh tul dang te Chief Minister ho hian FCS&CA Minister te, PWD, FCI, Railways leh district hotuten Bairabi ah hian ruahmanna an siam nghal a ni.

Chief Minister hian Sethawn After Care Centre chu a tlawh bawk a. Sethawn a Social Welfare Department hmun hi deaddiction and rehabilitation centre pui dinna tur ruahman niin tunah hian mi tam zawk awm theihna turin tihchangtlun hna thawh mek a ni a. Ruihhlo ngai te enkawl damna tur hmunpui tura ruahman a ni.

Vawiin vek hian Kawnpui pumpelh a tlang kawng tan tawi theihna tur kawng thar Chief Minister ho hian thlithlai a ni bawk.

Vawiin Kolasib District a national highway leh State road enfiah a Chief Minister a kal naah hian Kolasib DC leh district hotu dangte, PWD Engineer in Chief, Chief Engineer (Highway) leh department thawktu dangten an tawiawm a ni.