4 Assam Rifles, Serchhip ina a bultum, North India National Integration Tour, 20th Jan – 4th Feb 2009 chhunga kal, Mizoram hmun hrang hrang atanga zirlai naupang thlan bik, India ram khawpui, New Delhi, Jaipur leh Agra te tlawha zin te chu vawiin tlai khan Chief Minister Pu Lal Thanhawla chuan A.R.Ground ah Flagging In Ceremony hmanpui in a lo lawm haw.
Chief Minister chuan helai hmunah hian hetiang ruahmanna ang thova zinchhuak, batch hmasa te chu alo lawm haw tawh thu a sawi hmasa a. India ram zau tak, hnamze hrang hrang, tawng hrang hrang, sakhaw hrang hrang, thlahtu hrang hrang awmna ah hian inpumkhatna lam hawia hetiang programme buatsaih a ni chu Assam Rifles te chungah lawmthu a sawi a. Mizote hi hmun kilkhawr takah kan awm chungin, hmasawnna rah kan tel chho ve zel a. Tunah chuan sipai ah te pawh sawi tham kan awm ve tawh a ni a ti a. Pu Hawla chuan Mizote hi kan state pawna zinchhuak thei hi la tam vak lo mah ila, a zinchhuaka te chuan kan ram ropuizia leh mawizia hi an sawi nasa hle tawh a ni a ti a. Tuna zirlai naupang in thlante hi hmun hrang hrang ami, la in hre ngai reng renglo leh la inhmu ngailo miah lo te an ni a, an zinna atangin thil tangkai tak tak tur an rawn hawn ngei a besei thu sawiin, Mizoram in kan hlawkpui ngei ang a ti a ni. Brig. Anil Pratap Rai, Mizoram Range 23 Sector, Assam Rifles pawhin thu sawiin zirlai naupang zin lo haw te hi an kallam aiin an lo haw lam chu an fin belh ngei a beisei thu a sawi a. Hei hian khua leh tui tha zawkah a hlankai ngei a duhsak thu a sawi bawk a ni. Zirlai naupang te hi mipa 15 leh hmeichhia 15 an ni a. Mizoram pawn lama la zinchhuak ngailo thlan bikte an ni.