Peace Accord MNF Returnees Association (PAMRA) member 21 te tana ni 10 chhung (12 – 22 February 2013) awh tur National Integration Tour, 26 Assam Rifles-te buatsaih chu tukin zing dar 10 :00 a.m. khan Chief Minister Pu Lal Thanhawla’n HQ 23 Sector Assam Rifles office compound atangin a vailiam. Tour vailiamna inkhawm tawite buatsaihah hian Mizorama rawn zin mek sipai hotu lu pahnih – Lt. Gen. Arun Sahni, GOC, 3 Corps leh Maj. Gen. Satish Dua, IGAR (East) te pawh an tel a ni.

Chief Minister chuan Assam Rifles ten tun hmalam pawh khan naupang leh upa te tan national integration tour an lo buatsaih fo thin a, hetiang tour te hian rah tha a chhuah a, ram inpumkhatna atan hmaraw pawimawh tak a ni, a ti a, Tour a fehchhuak PAMRA member te chu tluang taka an zin theih nan duhsakna a hlan bawk. Assam Rifles ten Military Civic Action (MCA) programme hnuaia an hmalakna hrang hrang sikul a computer pek te, medical camp buatsaih te, hmun kilkhawra a awmte infiamna bungrua an pek thin te chu fakawm a tih thu sawiin hei hian Mizorama bikah chuan civil leh sipai inkara boruak tha leh inlaichinna thuk zawk te a siam thin a ni, a ti bawk. Mizorama Assam Rifles hotu lu Brig. G K V Reddy chuan he Tour buatsaih a nih theih nana Chief Minister in theitawp a chhuah sak avangin leh a hmalakna leh a puihna te chu fakawm tiin lawmthu a hrilh bawk a ni.

PAMRA member te hian Delhi leh Agra-a hmun pawimawh te leh sipai hmunpui engemaw zat an tlawh dawn a, Union Home Minister leh sipai hotu lute nen inkawm hona hun pawh Assam Rifles te hian an ruahman tel bawk a ni. Hemi bakah hian Shillong-a Assam Rifles hmunpui pawh an tlawh dawn bawk a ni.

Duan lawk ang chuan 22 February hian Aizawl an lo let leh ang.