Higher & Technical Education Minister Pu Lalsawta chuan vawiin khan Govt. Kolasib College Main Building sak tanna tur Lung, College hmunah a phum.

College Hall-a inkhawm neiha thuchah sawiin Pu Lalsawta chuan hun rei tak chhung chu Kolasib College hian building tha neilovin ram pumin sum leh paia harsatna a tawhte chu an lo tuar dai tawh a. Tuna Building thar sakna tur pawisa Rs 165,53857- DONER kaltlanga Central Finance Assistance, NLCPR atanga an dawng hi thil ropui, College leh ram tana thil chhinchhiah tlak tak a ni, a ti a. Bul tanna lung an phum ta chu College chhinchhiahna bu-a chuang reng tawh tur a ni, a ti. Pu Sawta chuan khawvelah thiamna technology a than chak em avangin chumi um pha tur chuan kan zirna system pawh kan tih changkan a ngai a. Chuvang chuan Skill development kan uar a, polytechnic leh College te mumal taka kan kalpui a tul a ni, a ti a. India ram hian thiamna hmangin khawvel ala chawm dawn a. India ram pawn hmun tamtaka hna thawh theihna tur kawng a inhawng zel a. Zirlaiten Certificate hmuh nan chauh nilova thiamna tak tak in neih theihna tura tan lak a ngai ta a ni, a ti a. Tunah hian mi sing thum chuang Employment Exchange-ah hna hmulo in register an awm a, hei hi sawrkar ang pawhin kan en liam mai mai thei lova, tihtak zeta tan kan lak a tul a ni, Pu Lalsawta chuan a ti a ni.

Pu R. Lalduhawma, Principal, GKC chuan inkhawm kaihruaiin College in building sak thatna tur hun thar a chuangkai chu lawmthu a sawi a. An harsatna thenkhat tarlangin Teacher/lecturer te hmunpui lama suan chhuah an ni thin leh an Post chawpa an kal thin chu zirnain a tawrh avangin hotuten enpui vat se tiin a ngen a ni.

Pu Zochungnunga, Director, Higher & Technical Education chuan thu a sawi bawk a.Pu F. Lalhmunsiama, Secretary, Building Committee, Govt. Kolasib College chuan report pein College sak dan tur tlangpui an ruahmante a sawi a. Ruahman ang chuan 3rd Nov. 2013-ah thawh tan a ni ang a, 3rd Feb. 2014-ah zawh a ni ang. Building zau zawng hi a ground floor 1798.07 Sq.m tura duan a ni a, chhawng thum tura design-in tuna sum neih hi a beitham avangin a ground floor chauh sak a ni hrih dawn a ni.

Minister hi Pi Malsawmthangi, Director, SCERT pawhin a tawiawm a ni.