Vawiin chhun dar 12.00 khan Home Secretary leh Chief Electoral Officer ni bawk Pu K. Riachho IAS room-ah Chalfilh bial-a bye-election neih tur chungchangah venhimna ruahman dante thlirho a ni. Election Commission of India duhdan angin Chalfilh biala bye-election neih a nih dawn avangin thenawm state-te leh ramdang nena kan inrina hmunahte uluk taka venhimna kenkawh mek a ni a; Chalfilh bial huam chhungah pawh a tul anga che chhuak mai thei turin security force-te hmun hrang hrangah an inkulh chho mek a ni. Chalfilh bial-ah hian polliong station 29 a awm a; chung zinga 13-te chu venhimna uluk bik ngaihna hmuna ngaih a ni. Election Commisision of India thupek angin a vawi khatna atan Mizoram inthlanah Video Surveillance team te, Flying Squad te din a ni a; heng team-te hian Election Model Code of Conduct bawhchhiatna awmtheite uluk takin an vil reng a ni. Tun thlengin Chalfilh bial chhung boruak chu a muanawm tih meeting-ah hian report a ni.

He meting-ah hian Pu A. Biaklawma, Chalfilh bial bye-election atana Returning Officer te, Pu Zorammuana DIG (Nothern Range) te, Pu L.R. Dingliana, SP Aizawl te, Pu Zosangliana Addl. SP (Security) te, Pu R. Vanlalsawta ACEO leh Pu Robert Thangmawia IPRO te an tel a ni.