Vawiin khan Assembly Annexe Building Conference Hall-ah Chief Minister Pu Lal Thanhawla chuan October ni 1 leh ni 7 inkar awh, 63rd National Wildlife Week, 2017 chu a hawng a. Wildlife Week hi India ram pumah hman mek a ni a, Mizoram chhungah pawh district tinah hman chhoh tur niin Media ah te tam zawka puanzar tum a ni a. Kumin hian Wildlife Week thupui atan, " People's Participation in Wildlife Conservation", 'Nungcha humhalhna kawnga mipui tel ve na' tih chu hman a ni.

63rd National Wildlife Week, 2017 hawngtu Chief Minister Pu Lal Thanhawla, Environment, Forest & Climate Change Minister ni bawk chuan tlangram loneih leh ramngaw hlutna hriat loh vang te leh nungchate chunga rilru put dan dik tawk loh avangin ramngaw leh nungcha humhalh kawnga hmalakna chu Mizoram-ah a sak hle tih a sawi a. "Mizo mipui te chu 'thilsiam zawng zawng hnenah Chanchintha hril  tura  zirtir kan ni a; hei hian kan ram hring satliah, ramngaw dik tak 1% pawh awm tawh lohna ah hian nungcha humhalh leh nungcha te chenna tur ramngaw siam that lehna kawngah mawhphurhna pek kan ni', a ti. Zahna leh inthlahrunna nei miah lova  sapel, silai pu a ram vak hmuhtur an awm fo mai chu a rilru nat thlak thu sawiin silai license an dil dan nen inmil lo nia a hriat thu a sawi a. Lo, huan thlai ven nan leh mahni inhumhimna atana silai license dil ten an dilna mil lo a silai che leka dan an bawhchhiat avangin nunna chan an awm thin chu pawi a tih thu sawiin silai nei te nasa zawka khuahkhirh dan dap pawh tha a tih thu a sawi a ni.

Chief Minister chuan Mizoram chu thlai, ramhmul chi hrang hrang leh rannung, thil nung chitin reng tam em em hmundang zawng aia a tamna hmun, hottest of  Biodiversity hotspots ah mithiam ten an tarlan avangin a chhunga ramngaw la awm te chu nasa taka humhalh ngai leh ven ngai a ni a ti a. Mizo scientist naupang tak tak, a ngaihna chang hria leh Mizoram Biodiversity hauhsakna awmze neia humhalh leh chhawr tangkai dan kawnga hmalak mek an awm chuan a tih lawm tak meuh thu a sawi a. "Rambuai chhung, kum 20 velah khan pawnlam mi ten min rawk na sa hle a kan nauban tam tak leh ramhmul hauhsakna tam tak an ru chhuak a. Hmannni lawk thleng pawh khan khawchhak lam atanga rawn lutru in kan ramngaw hauhsakna an rawk leh tih hriat a ni a. Tihtawp a nih theih nan, Zoram mipui te tanrual a ngai a, kan ram a thil hlu humhalh awm te pawh ka hmelhriat a ngai . Kan hnim hnah te pawh a tul lovah halral mai mai lova duat kan zir a ngai a. Kan ven loh emaw kan duat loh chuan kan ramhmul damdawi atana la mamawh tur hnimhnah te hi a tangkaina kan hriat hma in ka ti riral ang tih a hlauh awm a ni", a ti a. Hmarchhak bial chhunga Ayush Hospital hmasaberah Biodiversity hauhsakna, ramhmul damdawi atanga haichhuah a nih theih nan, Research Centre din tura dil leh nawr mek a ni a ti.

Mizoram chhunga pipute sulhnu leh Khuanu kutchhuak ang mawi sa hmuh chakawm leh tlawh theih te Department thenkhat sum siamna avanga a chhe thin chu sim a hun tih sawiin Biodiversity Hotspot kan nih angin a awm dan anga humhalh a pawimawh hrim hrim a ti a. Eco-Tourist te pawh in Mizoram chhunga pipu te sulhnu leh hmun mawi te chu Pathian in a siam ang ang leh pipute kutchhuak a nih ang anga humhalh a pawimawh ber a ti a. Chief Minister chuan Mizo thalai tam tak, Thlakna hmanga Sava veh thin, rual u zawk te, thahnem ngaih vanga an mahni senso a zoram hmun hrang hrang a Zothei Huan siam te, YMA leh tlawmngai pawl Ramngaw leh nungchaw humhalh kawnga thawhhlawk tak te, mimal thahnem ngai, nungchate tana ramngaw siamsak tu leh Nungcha humhalhna kawnga pawl anga insiam te avangin in Mizoram-ah thangthar te tan beiseina a awm thu a sawi a. "Tuna Thalai leh Naupang te hian an hmalam hun ti chhe zawnga ramngaw ti chereu thin te leh nungcha suat thin te lakah an thikthu ti chhia se, an nu leh pa te pawh Nungcha leh ramngawh humhalh kawngah zirtirna pe se", a sawt hle in a rin thu a sawi a ni.

Wildlife Week chungchanga thuhmahruai neitu, PCCF Pu Lal Ramthanga, EF&CC chuan ramngaw chereu zel leh mihring pung zel avanga ramsa te chenna a zim tial tial a, an chaw zawnna hmun a tlem telh telh a, mihring te nen an intawhna  hun leh hmun  a tam telh telh tih a sawi a. April 2016 leh September 2017 inkar khan Ramsa seh leh beih tawk mi 41 an awm a; chung zinga mi 6 in nunna an chan a, mi 35 in hliam an tuar a. Nunna chan mi 6 zingah Savawm seh 1, Rulchuk 4 leh Khuaiseh 1 an ni a. Hliam tuar zingah mi Savawm seh 9, rulchuk, 24, Sanghal tai 1 leh Ramsial  sik 1 an awm a ni. Ramsa vanga hliam tuar leh nunna chan te hi zangnadawmna pek vek an nih tawh thu PCCF chuan sawiin nunna chan te chu ralna sum chu Rs2,00, 000/- zel a ni a ti a. May 2015 atanga September 2017 thlenga State Animal, Sazu pul zat chu 118 a nih thu sawiin an natna chu College Of Veterinary Science, Selesih mithiam te nen tangkawpa an hmuh tawh thu leh Goatpox Virus vanga thi an ni tih chian a ni tawh a ti a, ADC 3-ah Saza thi report a ni lo a ti. Wildlife Protection 1972 hmanga ramsa tihlum hremna chu Kum 3 atanga kum 7 thleng, lungin tan a nih thu  leh October 2016 atanga September 2017 thlengin Case 8 chiah siam a ni, a ti a. Central Sawrkarin State tin te hnenah an state zau zawnga teh a 10% theuh ramsa humhalhna hmuna siam tura thupek a chhuah bawhzui nan Mizoram ah 8% tlin a ni tep tawh tih a sawi a. Wildlife Sanctuary bul hnaia awmte sawnchhuahna scheme, Village reallocation Cheme hmangin Thorang khaw chhevel a in 61 sawnchhuah tur zinga 55 chu sawnchhuah tawh a nih thu sawiin chhungkaw 6 pawh Court in chhuak turin thu a pe tawh a ti a. Sawnchhuah chhungkua te hi chhungkaw pakhat Rs 10,00,000/- zela zangdadawmna pek an ni a ti. Lungzarhtum ramsial chu sanctuary ah dah tum hmalak a harsat chhan sawiin Kahmut na, Tranquilizer gun hmanga kah mut a nih pawn a sawnna tur hnai ber KM 100 aia thui a nih avangin fimkhur thuhla ah tih loh tha zawk a hriat anih thu leh kawng dang dap mek a nih thu a sawi.

"Pathian hridai theu kan thiat" tih hmanga Dr.C. Lalhmingliana thusawiah chuan Pi leh Pu te atanga awmze nei taka ramngaw an humhalh dan leh khaw bul velah ramngaw an siam ziah dan te a tarlang a. Ramngaw humhalh thiah leh tih chereu avanga khawvel hmun hrang hranga chiatna thleng leh hrileng vanga mi tam tak thihna te sawi zau in ramngaw chu mihring tana venghim tu anih zia a sawifiah a. Dr.C.Lalhmingliana chuan, "Ramngaw leh nungcha humhalh chu mahni leh mahni mihringpui te humhalh; Nungcha, thing leh mau chunga ngilneih chhuah chu mahni in hmangaih", a nih zia thiam takin a hrilhfiah a ni.

63rd National Wildlife Week, 2017 hawnna inkhawm hi Principal Secretary & Principal Conservator of Forests Pu Lal Ramthanga'n a kaihruai a. PCCF hian Wildlife Week chungchang sawihawnna tawi hmangin Ramsa humhalhna kawnga hmalakna leh a kaihhnawih thil pawimawh langsar deuh te a tarlang a. He hunah hian Nungcha humhalh kawnga hmalatu, tawn leh hriat ngah tak,  Dr.C.Lalhmingliana, Padma Shri Awardee chuan  "Pathian hridai theu kan thiat" tih thupui hmangin mipui hnenah zirtirna a pe a. Chief Minister Pu Lal Thanhawla'n Nungcha humhalh kawnga zirtina keng tel, Music Video pahnih - 'Vau' leh ' I dinthar leh ang u' tih Damveng YMA Zaipawl in an siam chu a tlangzarh a. Pu Liankima Lailung, CCF(P&D) in  thusawiin Programme  a khar a ni.