North East Consultancy Services (NECS) din champhaphak, Foundation Day vawiin khan Vanapa Hall-ah lawmna buatsaih a ni a, Chief Minister Pu Lal Thanhawla’n a hmanpui.

Chief Minister chuan NECS dintu Robert Romawia Royte pianchamphaphak denchhena foundation day an hmang chu nachang hriat thlak hle a ni a ti a. NECS hi midangte tana malsawmna thlentu, kohhran thlenga thawh hlawk tak a ni a ti a. Mizoram bakah New Delhi, Kohima leh Shillonga office nei, Mizopa ngei mai ina hetiang Consultancy Firm a din hi a chhuanawm tak zet a ni a ti. Mi hausa tam tak zingah midangte tana inphallo thahnem tak an awm laia, Robert Romawia Royte te nupa hi lawm chunga thil ti thin, midangte tana mi inhawng leh thil pek uar tak an ni a ti a. An firm NECS hi Mizoram sorkarin a tangkaipui hle thu sawiin, Pu Hawla chuan chhawr zel pawhkantum a ni a ti. Midangte tana eizawnna siam saka hna thawktu 90 lai an awm chu a fakawm hle a ni a ti a. Kan buaina ber pakhat chu mahni hnaa tui loh hi a ni tiin, Chief Minister chuan khawiah pawh, eng hna pawh thawk ila Pathianin a rawngbawl tura min dahna a ni a, tui taka kan thawh hi kan mawh a ni a ti.

NECS Chairman leh Chief Managing Director Robert Romawia Royte chuan NECS hi kum 2007 din anih thu sawiin, mumal taka an kalpui tan erawh kum 2010 atanga anih thu a sawi a. An firm hi TT Group tia vuahin, a pa Thanthuama hming chawia a sak a ni a ti a. Hna an thawh dan hi chi li anih thu sawiin, pakhatnaah chuan mimal leh sorkar finchhuaha technical support pek ani a ti a, hei hi consultancy hna an thawhna lian ber a ni a ti. Pahnihnaah chuan hnathawhlai enkawl leh endik tiin, tunah hian Chhingchhip-a Sainik School tur sak mek hi an monitor reng a ni a ti a, pathumnaah building leh tul dang sak leh siam hna a ni a, tunah ringawt pawh hian Mizoramah Cheng vaibelchhe za hu hna thawh mek a ni a ti a. Palinaah chuan tanpui ngaite hnenah leh chawimawi tlakte hnena sum leh thil pek, charity a ni a ti.

He hunah hian chawimawi tlaka an thlan te hnenah 2013 NECS Awards Chief Minister hian a hlan nghal a. Chungte chu Citizen Awards Rs. 50,000/- Pu David Zohmangaiha, Mt. Everester hnenah, Employee of the year Rs.2 lakhs Engineer Vanlalnghaka Chawnchhek hnenah, Hnathawh that vang Rs. 1 lakh Lalhriatpuia, Architech, Best Mistiri Award Rs.20,000/- Omar Uddin, Best Driver Rs.20,000/- Aizawl FC of the year Rs.20,000/- Ricky Lallawmawma hnenah leh hnathawh that vang bawka Rs.1 lakh Engineer Z.L.Chhunga ten an dawng a ni.

Lawmnaah hian Pu Lalrinmawia Ralte, Minister of State for E& F, Pu H.Zothangliana, Parliamentary Secretary, Pu RL Pianmawia, Dy Chief Whip te bakah Pu O.T.Chingmak Chang, IAS, Secretary to Govt of Nagaland leh Shillong leh Tura atangin NECS hnathawk an tel a ni.