Vawiin khan Lunglei HPC Vice-Chairman Pu S.Laldingliana hovin ama office chamber-ah Lunglei Sanitation Task Force (LSTF) meeting hmasa ber neih a ni a. He hunah hian UD&PA Principal Secretary Pu R.L.Rinawma; SIPMIU Project Director leh LSTF Programme Co-ordinator ni bawk Er.Valbuanga te an tel a ni.

HPC Vice-Chairman leh Head of LSTF ni bawk Pu S.Laldingliana chuan member-te lawmna thu sawiin sanitation lama hmalakna thar tur ‘Septage Management Programme'  hnuaiah Lunglei khawpui chu thlan a nih avangin a lawmawm hle a ni, a ti a. Khawpui vawn fai leh cheimawi chu tunlai khawvel hmasawnna nen pawh a inmil hle a, Lunglei mipuite tan thil chhenfakawm tak a nih ngei a beisei thu a sawi a ni.

UD&PA Principal Secretary Pu R.L.Rinawma chuan khawpuia chengte an pun chak em avanga chenna ina Septic Tank enkawl dan felfai zawk, tha zawk leh enkawl awlsam zawka siam a tul chungchang te leh Asian Development Bank (ADB)-in he Project atan sum a hman tir dan tur te a sawifiah a ni. LSTF Programme Co-ordinator Er.Valbuanga chuan Powerpoint Presentation hmangin member kalkhawmte hnenah he Programme-in a tum hrilhfiahna hun a nei bawk a ni.

Vawiina meeting-ah hian IPE Global Pvt. Ltd., New Delhi atanga lokal Program Technical Consultant Pu Parthajit Patra-in Project kalpui dan tur a sawifiah a, Workshop leh Training pawh mumal taka neih chhoh a nih tur thu a sawi.

ADB tanpuina hnuaiah India hmun 3 - Himachal Pradesh, Aizawl leh Lunglei - ah te Septage Management Project hi kalpui hmasak a ni dawn a ni.

Attachment

  • Loading attachment...