Chief Minister Pu Lal Thanhawla chuan vawiin khan State Guest House Conference Hall-ah NORTH EASTERN ELECTRIC POWER CORPORATION (NEEPCO) Board of Directors Meeting vawi 213-na a hmanpui.

Chief Minister chuan NEEPCO in Aizawlah Board of Directors Meeting an rawn nghat chu kan vannei hle a ni a ti a. Hmasawnna ruhrel tha, infrastructure kan nei tawklo erawh chu in mi hriatthiam kan duh a ni tiin, Mizo ten mikhual kan dawnsawn danah an tan tawnhriatna thar anih ngei a beisei thu a sawi a. NEEPCO chu hmarchhak bial tan power siamchhuaktu pawimawh tak an nih thu sawiin, hmarchhak bial hi power, abikin hydel power siamchhuah theihna hmunpui a ni chungin power kan khawpkhamlo em em a ni a ti a. 50,000 MW power siam chhuah theihna awm si, 11% pawh kan siamchhuaklo a ni a ti a. Mizoramah phei chuan 1% vel chauh kan hmang a ni a ti. Hei hian hmasawnna a tih chak loh phah hle a ni a ti.

Chief Minister chuan hmarchhakah Neepco hian power siam zawng zawngah 50% vel an thawk chhuak a ni tiin, hmun harsa leh chhengchhe tak kara a hnathawkte inpeknaah kan lawm hle a ni a ti a. Keini pawhin tanpui ngaihnaah kan inhawng reng a ni a ti. Thermal power lamah pawh Neepco chu kal se a duhthu sawiin, Chief Minister chuan natural gas leh lungalhthei 60:40 ang tea tlangramah hydro-thermal mix siam a, micro hydel leh non conventional source te dap chhuak se a duh thu a sawi a.

Neepco hian National Solar Mission atanga sum leh technical lama puihna te dap se tiin Chief Minister hian a rawn bawk a. Tuirial Hydel Project 60MW power pechhuak thei tur hawn hlan a nghahhlelhawm a tih thu a sawi bawk a. Tuivai Hydel Project 210 MW power siam chhuak thei tur pawh Mizoram sorkar-in Neepco kutah hlan nise tia a rel tawh pawh a sawi a ni.

Neepco Chairman & Managing Director Pu P.C.Pankaj chuan Chief Minister Pu Lal Thanhawla’n Board of Directors Meeting a hmanpui chu lawmthu a sawi a. Neepco in Mizoram project a kenkawh te chu a hun taka zawh vek a tum a ni a ti a. Hetih lai hian kumina hawn hman tum, Tuirial Hydel Project chu a Power House bul leichim avangin a hun takah hawn theih a beiseiawmlo a ni a ti a. Kumin May thla khian a tuikhuah (Dam) chu zawh hman a ni ang a ti a. Tuivai project pawh Neepco kuta hlan a ni chu lawmawm a tihthu a sawi a. Mat Hydel Project chungchangah Central Water Commissionin DPR an buatsaih mek a ni a ti a. Lungreng leh Chhimtuipui Hydel project te pawh bawhzui reng a ni a ti a, a huna zawh hman vek tum a ni a ti. Pu Pankaj chuan Hydel project ngau ngau ah chuan Mizoramah an ngah ber a ni a ti a. Solar power siamchhuah lamah pawh hmalak tum anih thu a sawilang bawk a ni.

Chief Minister hi Pu T.P.Khaund, Principal Adviser to Govt of Mizoram & Neepco Permanent Invitee bakah Pu L.Pachuau, E-in-C, P&E leh P&E Chief Engineer pahnih Pu Vanlalhruaia leh Pu Lalnunmawi Sailo ten an tawiawm a. Neepco hotu dang U Moral, Director (T), A.G.West, Director(F), S.Borgohain, Director(P) leh S.C.Verma, Chief Vigilance Officer te an tel bawk a. An ni bakah Central Ministry hrang hrang atangin Independent Director 5 an tel bawk a ni.