DoNER Minister Gen.V.K. Singh kaihhruaina hnuaia North Eastern Region Infrastructure Conclave, 2014 vawiina Guwahati a Hotel Radisson Blu a neihah Chief Minister Pu Lal Thanhawla chuan hmarchhak bial leh Mizoram mamawhte a thlen.

Chief Minister chuan hmarchhak biala hmasawnna chak tak a awm theihna tura investment tam zawk siam anih theih nan he intawhkhawm (conclave) buatsaihtu PHD Chamber of Commerce and Industry chungah lawmthu a sawi a. Hmarchhak bial hi history leh kan awmna avangte hian hun rei tak ata tawh ngaihthah kan ni a, a taka hmalak hi tih makmawh a ni a ti a. Hmasawnna awm turin a ruhrel pawimawh, infrastructure facilities din angaih thu vawi duailo national leh regional levelahte sawi anih bakah, committee leh task force te, Shukla Commission te, Yugandhar Committee Report te, Mukherjee Task Force te dinin rawtna tha tak tak an siam a, mahse a taka bawhzui a ni thin lo a ni a ti a. DoNER Ministry pawhin NE Vision : 2020 pawh a duan thu a tarlang a.’Vawiina he foruma ka tel pawh hi vawi nga ka telna niin ka hria’ tiin, Chief Minister chuan rawtna kan siam turte hi thamral tir mai loa, a taka bawhzui anih ngeina turin PHD Chamber of Commerce and Industry hian hma la turin ka ngen nghal a ni a ti.

Chief Minister chuan kan thupui ‘Power Sector in N.E.Region : Challenges and Way Forward’ tih a nih angin power siamna, abikin hydro power siam chhuahna hmarchhak bial hian a ngah a ni a ti a. Power telloin hmasawnna a awm theilo tiin, rampuma power siam theihzat hmarchhak bial hian 40% (63,000MW) vel a nei a ni a ti a. Mahse 3% vel chauh siam chhuah anih avangin powerah kan hnufum hle a, hmasawn tur angin kan sawn theilo ni a ti a. Mizoramah phei chuan kan mamawh ang kan hmu phalo hle a ni a ti a. Hmarchhaka NEEPCO hmalakna a fakawm hle tih Pu Hawla chuan a sawi a. Hydro power bakah Thermal power pawh siam a pawimawh thu a sawilang bawk a. Power sectora private investment a awm theih nan Viability Gap Funding guidelines te hi herrem awlsam tura siam nise tiin rawtna Chief Minister hian a thlen bawk a.

Chief Minister chuan keini ang tlangramah chuan micro hydel power generation hi uar zawka kalpui tha a tih thu a sawi a. Hei hian thingtlang lamah cottage level industry din a tih awlsam a beiseiawm a ni a ti a. Ministry of New & Renewable Energy pawhin power siamah min phurpui se a ti a. Power thawnchhuah leh sem chungchanga harsatna awmte pawh a sutkian dan central sorkarin enpui se tiin Chief Minister chuan a sawi bawk a. Hmarchhak biala hmasawnna project duan reng reng hi a ram leilung awmdan a zira a tehfungte pawh chutianga siam ni thin se tiin, Chief Minister chuan tlangram leh phai te chu tehfung inang a hman kawp theih loh a ni a ti. NEC in a zirchiannaah tlangram ah chuan senso chu 15% - 20% in a tam thin tih hmuh thu pawh a sawilang a. Hmasawnna project te hian environment a tihchhiat theih avanga fimkhur a tul thu Chief Minister hian a sawilang bawk a. A tlangpui thuah central sorkar hian hmarchhak biala hmasawnna project te hi a dah pawimawh tawk loa a hriat thu a sawichhuak a. Hei vang hian Kolodyne HEP 460 MW pechhuak thei tur siam tura NTPC leh Mizoram sorkarin MoU an ziah tawh hnu kum 6 a liam hnu pawhin engmah hmalakna a awm lo a ni a ti.

Chief Minister Pu Lal Thanhawla chuan Union Power Minister chak tak hian hmarchhak bial danglam dawrh thei khawpa hma lakpui a beisei tlat thu a sawi bawk a ni.

Conclave ah hian hmarchhak state Chief Minister te bakah Union Minister engemawzah an tel bawk a ni.

Attachment

  • Loading attachment...