2713/2026-2027

Ngaizawl the 16th October 2026: Vawiin khan Chief Minister Pu Lalduhoma chuan Ngaizawl khawtlangin Khawdo Kut an buatsaih chu khuallian niin a hmanpui. Bialtu MLA Er. H. Ginzalala, Adviser to CM chu khualzahawm a ni. Khawzawl DC Pu K. Vanlalthiana, SP Pu Amit Kaushik leh district official ten an tawiawm bawk.

Khawdo Kut (Khuado Pawi) hi Mizo hnam peng Paite kut ropui bera ngaih a ni a, chanchin hlui zirtu (Historian) te chuan AD 1400 vel atangin he Kut hi an la hmang tawh thin niin an ngai.

Thusawiin Chief Minister chuan, Tualpui khaw mite tan chuan Ngaizawl hi mahni khua ang maia kan en a ni a. Khaw mipuite pawh u leh nau anga kan ngaih an ni. A khaw ram, a tlang dung leh ruamte hi kan mitthla kual thei vek a. Ka lung tileng thintu, ram ngaihawm tak a ni. Vawiinah rawn kalna remchang ka neite hi ka lawm a, khawtlang mipuiten hlim taka min lo mikhual avangin a hahdamthlak pawh ka ti hle a ni, tiin Kut chibai a buk a. Mizo hnam peng hrang hrangte Kut leh ze tha tinrengte chu Mizo hnam thil pawimawh an ni vek a. A theih ang angin kan humhalh zel tur a ni, a ti.

Khawdo Kut hi lawmthusawina Kut a nih angin tun hnaia Ngaizawl khawtlangin hmasawnna thar a hmuh thenkhat a tarlang a. Chungte chu:

SASCI 2026 – 27 Part – I (Untied) ah Ngaizawl to Tualpui kawng laihna tur Rs. 5.36 Crore dah a ni a.

Ngaizawl H/S buildingah zirlai naupangte an len tawh loh avangin H/S building zauh nan Chief Minister hian Rs. 25 lakh a pe.

Ngaizawl khaw kiangah hian van ruahtui leh luite tui dahkhawlna tur tuikhuah (Eco Tourism Water Harvesting Pond) lian tham tak kan siam mek a, a thawh zuina tur Rs. 376 lakh kan dah a ni.

Khawzawl to Ngaizawl kawng 13.340 Km a thui hi PMGSY-II hnuaiah ni 1.04.2024 khan thawh zawh a ni a. Dan angin ni 31.03.2029 thleng khian Contractor hian a enkawl zui ang. A chhe zual chu kumin kumtirah khan siam a ni.

Rs 5.26 Crore senna Ngaizawl WSS Solar Pumping NABARD RIDF-XXVIII hnuaia thawh chu kumin March 2025 khan thawh zawh a ni.

Ngaizawl khuaah hian Self Help Group 11 an awm a, Startup Cost leh Revolving Fund an dawng vek tawh a ni. Heng SHG te hman tangkai tur hian ran chaw herna khawl pahnih dah a ni.

Finanical Year 2025 – 2026 chhung khan Ngaizawlah Ni Za inhlawhna aṭangin mipui inhlawhna Rs. 49,85,702/- a lut a, material component Rs. 47,75,500/- , a vaiin Rs. 97,61,202/- sen a ni, tihte an ni a. Bialtu MLA Er. H. Ginzalala hmalakna dangte pawh sawi langin, Engineer thiam takin kan ram tana tha tur ruahmanna lian tak tak a siam a, a taka an hlawhtlin hun hi a nghahhlelhawm em em a ni, a ti.

Chief Minister hian, "A tirah thlai thar pangaah support price kan pe a, tun hnaiah thlai dang paliah kan pek belh a. A vaiin thlai thar pakuaah support price kan pe a, kuthnathawktuten a rate hre sain thlai in lo ching ta a ni. Khaw taima Ngaizawl pawhin in tangkai ngeiin kan ring a. Heng sorkar scheme tha tak takte hi lo chhawr ngei ang che u", tiin a chah.

Khawdo Kut hian ram leh kan hnam hmangaih a pawimawhzia min hrilh nawn se, ram leh hnam dingchhuak ni tura inbuatsaih a tulzia min zirtir se, kan tu leh kan fa lo la awm zel turten hlim taka he Kut hi an rawn hman zui ve zel theih nan – hmathlir fel tak nei chungin, kawng dik takah kal i tum tlat ang u, tia sawmin, an kal zelna turah duhsakna a hlan a ni.

Kut hi Ngaizawl khelmualah hman a ni a. Pu A. Thangsuanpau, Vice President, VC chuan a kaihruai a, Pu Khaikhatpiang chuan hunserh a hmang a, khualzahawm Pu H. Ginzalal, Adviser to CM leh Pu Robert Khamkhanpau, President, VC te pawhin thu an sawi a ni.

Ngaizawl hi kum 1927 ah Burma atanga rawn tla thla Paite hnamten Tualpui lal ram chhungah, khatihlaia Tualpui lal Thanherhna phalnaa an din a ni a. A hnuah lal Thanherha fapa naupang zawk Khenchhuma chuan a awpzui ta a ni. Rambuai lai khan Khawzawlah khawm an ni a. Nimahsela, Jhum Permit hmangin Ngaizawlah hian Bawk an khawh zui zel a. Chuvang chuan 1927 atanga vawiin thlengin mei a mit lo tia sawi theih a ni.

Tunah hian in 205 an ni mek a, mihring 1200 vel an cheng a ni.