2714/2026-2027

Aizawl, 16 October 2026: Vawiin khan Secretariat Conference Hall, MINECO-ah Higher & Technical Education Minister Dr Vanlalthlana hovin Department Review Meeting vawi thumna neih a ni a. H&TE Department hnuaia hmalakna leh hnathawh hrang hrang thlirho a ni.

Minister Dr Vanlalthlana chuan thu sawiin, department hmalakna leh harsatna tawh mekte sawi ho a ni ṭhin hi department-a thawkten an ṭhatpui tlang a ni, a ti a. Department hnuaia office leh college hrang hran ten harsatna an tawh sawi tlan a nih hian, department hawi zawng tur leh hma lak zel dan tur chiang taka a lan ṭhin thu a sawi.

Secretariat, directorate, subordinate office leh college hrang hranga thawkte chu fakin, tun hnaia department hnuaia hmalakna hlawhtling tak takte chu an thawh rim rah a nih thu a sawi a. Kumina Higher & Technical Education Department-a thawk mi pasarih (7) chatuan ram pan tate chu an hriat reng thu a sawi bawk.

Minister chuan zirlaiten zirtirtute assessment an tihna tur pro forma buaipui mek a nih thu sawiin, a hma thei anga bera hman tum a nih thu leh zirtirtute pawh ṭan la leh zual turin a chah.

Meeting-ah hian department achievement ngaihthlak a ni a. Kum 2026 chhungin mi 70 chuan promotion an hmu tawh a. 2025-2026 chhungin Pre-matric scholarship dil mi 8,875 aṭangin 2026-2027 chhungin mi 10,238-ah an pung a; post-matric scholarship-ah 2025-2026 chhungin mi 32,375 aṭangin 2026-2027 chhungin mi 36,496-ah an pung bawk.

Meeting hi Commissioner & Secretary Dr Lalrozama chuan a kaihruai a. Review meeting hmasa bawh zuina ngaihthlak niin, Higher & Technical Education Department hnuaia office leh college hrang hrang aṭangin an hmalakna kal mek leh hmachhawpte ngaihthlaka sawi ho a ni.