2715/2026-2027

Dated Aizawl, the 16 October, 2026: Mizoram Cooperative Apex Bank Ltd. Board of Directors’ Meeting chu vawiin khan Head Office, Tuikual South ah neih a ni a. Board Meeting hi Pu Lalnunsanga’n a kaihruai a, Mizoram sawrkar flagship programme Bana Kaih (Handholding Scheme) a 'Most Agile Bank Award’ an dawn chu lawmawm a tih thusawiin mipuite tana tangkai lehzuala bank an inhawn zel a pawimawh thu a sawi a.  Society te hnena pung tlem zawka loan an pek theih nan NABARD atangin Short Term Refinance Vaibelchhe 8 (eight crore) an lak thu a tarlang bawk.

Meeting hian Loan hrang hrang mimal loan 63 leh Biak In sakna loan 22  avaia belhkhawmin cheng vaibelchhe 18.56 pek a rem ti a. Mimal loan pekchhuah te hi;- personal loan, handholding loan, Agri leh Allied Agri leh sumdawnna loan te an ni.

Apex Bank hian Mizoram hmun hrang hrangah Branch 37 leh ATM Booth 45 a enkawl mek a. Tun dinhmunah deposit cheng vaibelchhe 1907 neiin loan cheng vaibelchhe 1300 a pechhuak mek a. Sum kawl atanga loan pekchhuah tehfung CD Ratio hi 68.22% a ni mek a ni.

Hemi rual hian Mizoram Cooperative Apex Bank Ltd. chuan Mizoram hmun hrang hranga Multipurpose Primary Agriculture Credit Societies ( MPACS) ding thar te tan Basic Accounting Training a buatsaih a. He training hi Apex Bank Conference Hall, Head Office, Tuikual South-ah ni thum chhung neih niin vawiin khan zawh fel a ni.

Training ah hian MPACS 15 atangin mi 27 an tel thei a. Training chhung hian MPACS in Accounting an vawn dan tur Common Accounting System hnuaia lehkhabu vawn dan hrang hrangte, MPACS hnuaia activities kal pui theih hrang hrangte bakah MPACS Byelaws leh Society Act & Rules te zirtir an ni.