2716/2026-2027

Dated Serchhip, the 16^th October, 2026: Serchhip leh Aizawl inkar kawng, NH-02, kawng khuar hnawh thatna hna Permanent Repairment thawh mekte chu vawiin khan Deputy Commissioner Pu Paul L. Khuma hovin endik a ni.

Kawng khuar hnawh that hna, Permanent Repairment hi October ni 10 atang khan tan niin, temporary-a hnawhnate phawrh chhuah vek a, metal that vek tura ruahman a ni a; technical guidelines / codes ang taka hna thawh a ni em tihte endik niin, tha tawk lo lai leh dik tawk lo laite chu tih that tir nghal an ni.

Bawrhsap chuan hnathawktu Contractor KRAM Infracon Pvt. Ltd te chu a nih dan tur ang thlapa ti turin a chah a; thil dik lo a awm lohna turin, tun dinhmunah kawngin a paltlang khua tlawmngai pawlten kawng siam hna thawh te an vil mek bakah naktuk October ni 17, 2026 atangin DC Office-a NH Staff te chu ni tinin heng hnathawh dante vil a, enzui turin a ti bawk. 

Bawrhsap chuan kawng chu mipuite ta a nih thu sawiin, kawng siamtute chu kawng tha kan neih theih nana enzui reng an nih tur thu a hrilh a; Serchhip District-in kawng tha kan neih theih nana khawtlang hruaitute inpeknaah lawmthu a sawi bawk.

Vawiin kawng siam hna thawh endiknaah hian Addl. DC Pi Dorothy Muansangi, SDC Pu Vanthangpuia, PWD SDO Pu Lalrinhlua Ralte, DIPRO Pu R. Vanneihtluanga te bakah MJA President Pu Kapliana Pachuau, Jt. VC Chairman Pu R. Sanghmingthanga, VC Association President Pu B. Vanlalsawma, YMA Sub-Hqrs President Pu PC Vanlalluna te an tel a; NHIDCL hotute leh Authority Engineer ten an tawiawm bawk.