Vawiin chawhma khan Thenzawl Vengchhak Tribal Girls' Hostel Building-ah NIELIT Study Centre Thenzawl chu  Chief Minister Pu Lal Thanhawla'n   a hawng. 

NIELIT hmalakna sawiin Chief Minister Pu Lal Thanhawla chuan Mizoram mipui ten computer thiamna kawngah hma an sawnna turin tunhma DOEACC a nih lai atangin theih tawp a lo chhuah thin a ti a. NIELIT Study Centre Thenzawl chu Thenzawl leh a chhehvel khua zawng zawng te tan malsawmna a nih ngei a beisei a ti. Eng kawngah pawh thiamna satliah mai a tawk lova thiam bel, uluk peih leh hmawrbawkna pawimawhna hrethiam khawpa thiamna a pawimawh. Thiam lawr duah aiin thiambik neih a tha a ti. 

Hmasawnna ruhrel tamtak siam thin mah ila a hlawhtlinna atan chuan a chhawrtu mipui rilru a pawimawh ber a ti a. Thenzawl chu a awmna in a zir a vangin khawpui thangzel thei dinhmunah dingin a khaw mipui ten an khawvel tukverh te lo hawngzau in hmasawnna mil zela  insiam rem an zir a ngai a . Hmathlir thui tak nen hmalam hun thlirin an inrilru an inbuatsaih a ngai a ti. 

Aizawl khawpui a kawngpui te chu tlangram khawpui dang kawngpui te aiin zim bik lo mahse mi duham te vangin a tawt a. Thenzawl leh Mizoram khawpui dang ten Aizawl khawpui dinhmun entawn tlaklo chu lo invenlawkna atan hrechiang se tha a tih thu a sawi. 

Chief Minister chuan duhsak tlak, hlawhtling tlak a mipui te kan inher rem a ngai tawh a ti a. Kuttlinglova sum lakluh duhna hian harsatna namen lo vawi tam Mizoram hmasawnna kawngah a siam tawh a ni a ti. Zoram mipui ten kuttlinglova sum lakluh ching te an huat a hun tawh a. Tunlaiah company leh sawrkarin ramruakah man neilovin hmasawnna ruhrelte din an duh vek tawh a. Compensation beiseina a la awm reng chuan hmasawnna ruhrel tam tak Mizoram in a chan ang tih a hlauhawm a ni a ti. 

NIELIT Study Centre-ah hian naktuk atangin  zirlai ten class an kal tan dawn a. Batch hmasa berah zirlai admission diltu tamtak atangin zirlai 100 admission pek an ni a. Computer zirtirtu 2 leh Computer sets 20 dah niin zirlai 100 ten shift panga - 7 to 8 AM, 1 to 2 PM, 2 to 3 PM, 4 to 5 PM leh 5 to 6 PM ah te class an kal ang a. He NIELIT Centre-ah hian Course On Computer Concept(CCC) zirtir a ni dawn a. CCC exam thei tur hian nitin darkar 1 tal vawi/ni 80  tal class kal a ngai a, CCC Examination hi Online hmanga neih  a ni. 

NIELIT Study Centre hawnna inkhawm hi Pu C.Vanlalnunga, Deputy Director, NIELIT Aizawl in a kaihruai a. He hunah hian sawrkar mi pawimawh leh zirlai thar te bakah khawtlang hruaitute an tel a ni.