Nimin chawhnu khan Mizoram Chief Minister Pu lal Thanhawla chuan Thenzawla National Institute of Technology (NIT) hmun tura ruahman chu a hmunah kalin a thlir a, Education Minister Pu Lalsawta, Parliamentary Secretaries Pu Chawngtinthanga leh Pu H.Zothangliana te bakah Higher& Technical Education Department hotute bakah Thenzawl khawtlang aiawh te leh chanchinbumi thahnem takin an tawiawm a ni.

Thenzawl khua in NIT hmun tura ram an pek hi Thenzawl khawchhung atanga hnai te ah awmin phul rai nuam tha tak a ni a, Golf Course tura ruahman mek bulah a awm a, a hmun zau zawng hi uluk zawka la teh that leh tura ruahman niin NIT Campus mamawh zawng zawng chu thawl taka leng kim thei vek tura ngaih a ni a, Thenzawl VCP Pu Sailova chuan helai hmun ah hian mimal ram nei an awm thu hriat anih loh thu sawiin Chief Minister pawhin NIT chu Mizoram hmasawnna kawng a rahbi pawimawh tak anih avangin Sawrkar pawhin a hlawhchham a phal dawn lova, NIT hmun tura mimal ram lo nei palh an awm pawhin cancel sak mai an ngaih tur thu a sawi a ni.

Chief Minister hian NIT hmun tur a tlawh hnu hian Thenzawl khaw hmawra AH&Vety ram enkawl lai mek chu tlawhin hmun thenkhat sahthlak a Amusement Park / Recreation Centre siam nan a remchan dan tur a thlir nghal a, UD&PA mithiam te pawhin CM hi tawiawmin ruahmanna an siam dan te an hrilhfiah a, he hmun hi a remchan theih dawn chuan Rs. 20 crore (Vaibelchhe 20) vel sengin intihhlimna leh hahchawlhna hmun tunlai leh changkang tak a siam theih dawn niin an sawi a ni.