Ni li awh tur Vantawng Group YMA Sports Meet vawi hnihna chu nimin khan Thenzawl Public Playground-ah tan a ni a, bialtu MLA Mizoram Chief Minister Pu Lal Thanhawla’n hmanpuiin Sports Meet hi a hawng a ni.

Chief Minister chuan Sawrkarin thalaite tana khawvel thar a buatsaih mek zel thu sawiin thalaiten eizawnna thianghlim an hmuh theih nan leh khawvel nun kawng dik zawk an zawh theih nan  nasa taka tan a lak thu leh heng hmalakna zinga pakhat “Catch them Young” policy pawh hun reilote chhungin a rah a lang tan der tawh a ni tiin he ta tan hian sum pawh dah belh zel anih thu a sawi bawk.

Chief Minister chuan thalaite hmakhua ngaia Mizoram Sawrkarin zirna lama hma a lakna te pawh sawilangin National Institute of Technology (NIT) hmun tur pawh Thenzawlah ngei tihfel anih thu leh campus pawh changtlung taka siam anih tur thu a sawi a, tun thla chhungin Indian Institute of Mass Communication (IIMT) pawh tan anih dawn thu te, reilote ah IIM pawh neih thuai anih tur thu te bakah Medical College hlawhtlinna tura chak taka hma lak anih mek thute, Chhingchhip-a Sainik School tan thuai anih tur thu te pawh sawiin, Mizoram chu India rama Education Reforms Commission din hmasa ber dawttu State anih thu a sawilanga, hetiang ruahmanna chang hria leh Mizoram thatna tur tak taka rilru seng thiam Minister leh Sawrkar hotu kan nei chu vanneih thlak a tih zia sawiin hei hian Mizorama zirna kalphung siam that kawnga kawngrto nasa taka a sut beisei anih thu sawi bawkin, thalaite chu heng hmasawnna atana ruahmanna hrang hrang te hi chhawr tangkai thei tura nun uluk turin leh hlawkpui ngei tum turin thalaite chu a chah nghal bawk a ni.

Vantawng Group YMA Sports Meet hi a tumhnihna niin nimin August ni hnih atanga August ni nga (Zirtawpni) thleng he Sports Meet hian a awh ang. Vantawng Group YMA hnuaiah hian YMA Branch 13 awmin YMA member 4000 vel an awm a, tun tum intihsiaknaah hian branch tin te an tel kim vek a ni. He intihsiaknaah hian Discipline 5 – Football (Mipa), Volleyball (Mipa & Hmeichhia), Mizo Sairawkherh in perh siak (Mipa), 100 Metre Race (Mipa), Kawi kah (Hmeichhia)- ah in el a ni dawn a, heta point hrang hrang hmuh zat belhkhawma a sang ber chu champion an ni dawn a ni.

Pu Zoliana Royte, Director Sports, & Youth Services ziah ‘Dictionary of Games & Sports” chu he intihsiakna a tel YMA Branch tin te hnenah hlan an ni a, heng lehkhabu te hi Pi Lalrampari, SAI  Administrative Officer-in a donate a ni.

Chief Minister hi a nupui Pi Lal Riliani, Education Minister Pu Lalsawta leh a nupui Pi Lalropari, Parliamentary Secretaries Pu Chawngtinthanga leh Pu H.Zothangliana te bakah Sawrkar mipawimawhte leh chanchinbumi thahnem takin an tawiawm a ni.