Vawiin chawhnu khan Pu Zoramthanga, Chief Minister chuan Dr Rajiv Kumar, Vice Chairman, NITI Aayog hmuin Mizoram hmasawnna tura hmalak dan tur kawng hrang hrang a sawipui a. Sawrkar laipuiin heng hmalakna tur pawimawh hmachhawp te a Mizoram a puih theih dan tur an sawi dun a ni.

Pu Zoramthanga chuan Mizoram hmasawnna tur atana nasa taka hnathawh dan tur kawng hrang hrang a a hmachhawp te sawiin NITI Aayog pawhin a tul anga hma an lak pui a ngaih tur thu a hrilh a. Rua hmanga Mizoram leh North East economy nasa taka tih hmasawn a nih theihna atana a hmachhawp te hrilh in Central Sawrkar Department hrang hrangin an puih theihna tura NITI Aayog in hma a lak pui theih dan tur an sawidun a. NITI Aayog in theihtawp an chhuahpui tur thu leh Central Ministry dangte nena an thawhho theihna tura ruahmana pawh an siam tur thu Vice Chairman, NITI hian a lo hrilh a ni.

Chief Minister chuan tlangram, hilly states tana Cost Norms hranpa siam a tul thu a thlen a. NITI Aayog in chak taka hma a lak a nih tur Vice Chairman hian a lo hrilh.

Hei bakah hian India hmarchhak a chengte tana Gross Budgetary Support tangkai zawka hman theih a ruahman a tul thu te, NEC leh Ministry of DONER thuamchak a tul thu te, North East States tan bik External Aided Project awlsam zawka hmuh a nih theihna atana inkaihhruaina guidelines siamthat a ngaih thu te leh hmasawnna atana hnathawk tur hmachhawp tam tal an sawidun bawk.