New Delhi-a cham mek Chief Minister Pu Zoramthanga chuan sorkar laipuia Minister hrang hrangte a dawr chhunzawm zel a. Vawiin khan Union Tribal Affairs Minister Pu Arjun Munda nen inkawmin Mizoram tana thil pawimawh hrang hrangte an sawidun.

Chief Minister chuan Mizoram chu ruihhlo tamna ram , Golden Triangle tia sawi Thailand, Myanmar leh Laos ram hnaiha awm a nih avangin ruihhlo hmansual leh ruihhlo tawlh ruk venna kawngah nasa taka hmalak a ṭul thu a Union Minister chu a hrilh a. Ruihhlo ngaite leh ngawlveite enkawlna hmun Rehabilitation Centre changtlung tak din tura hmalak mek a nih thu leh chumi atana tanpuina awm thei te ngaihtuahpui turin a ngen a. Centre of Excellence in Sports tam zawk din chungchang te, lo neitute thlai tharchhuah hlawk zawka hralhna tur te, Mizoram University leh India ram khawpui lian zualtea Tribal Hostel sak chungchang te bakah Mau leh Rua hman tangkai dan tur leh uar zawka chin dan turte a sawipui bawk. Union Minister chuan hengte hi a lo enzui tur thu leh theihtawpa hma a lak zel tur thu a hrilh.

Chief Minister chuan Union Minister for Railways leh Commerce and Industry Minister ni bawk Pu Piyush Goyal chu a office ah a kawm bawk a. Sairang thlenga Rel kawng siam mek chungchang an sawi dun. He hna hi thawh zawh thuai a ṭul thu leh harsatna awmte pawh a hnena hriattir thuai ṭhin turin Union Minister chuan a hrilh. Pu Zoramthanga chuan Zokhawthara Land Custom Station tihchangtlun chungchang te, dan phal loh bungrua tawlh ruk chungchanga Myanmar sorkar nena inbiak chungchang te, Kawrpuichhuah leh Zorinpui a Land Custom Station din chungchang  te,  Saisihchhuah, Hnahlan, Vaphai, Farkawn, Thingsai leh hmun ṭhenkhata Border Trade point hnathawh chhunzawm dan tur leh Act East Policy chungchangte an sawi dun bawk.

Vawiin vek khan Chief Minister chuan Airport Authority of India (AAI) hotute an office ah a kawm a. Mizorama thlawhna tam zawk service tir chungchang te, khualzin phur chi mai bakah bungraw phur chi thlawhna service tir chungchang te, Lengpui airport tihchangtlun te leh Helicopter tam zawk service tir chungchangte an sawiho bawk a. AAI thuneitute hian Chief Minister in an office ngeia Mizoram mawhte thlena a tlawh chu lawmawm an tih thu leh a theihna apiangah a thu thlente chu an lo bawhzui tur thu an hrilh.

Chief Minister hi State Planning Board Vice Chairman Pu H. Rammawi, Sports Minister Pu Robert Romawia Royte, Chief Secretary Pu Lalnunmawia Chuaungo, Planning Secretary Dr.C.Vanlalramsanga, Principal Consultant, GAD(Aviation) Wg. Cdr. J.Lalhmingliana leh official dang ten an ṭawiawm a ni.