Mizoram Chief Minister Pu Lal Thanhawla chuan vawiin chawhnu khan Serchhip Zawlpui, Mat phai ah NLUP Pilot Project “Buh leh Sangha khawi pawlh” (Paddy-cum-Fish Culture) a hawng a, he pilot project hi Serchhip District chhunga Mat phai leh North Vanlaiphai leilet hmunah te kalpui a ni dawn a ni.

Hawnna thusawitu Chief minister chuan buh leh sangha khawi pawlh rawt chhuaktu Fisheries department te chungah lawmthu sawiin hmasawn tur chuan thil thar leh hmathlir thar kan neih a, hma kan lak thiam a ngai a, a lo fuh lo palh deuh anih pawhin a aia tha tur zawk zawnchhuah nan kan hmang leh zel thiam tur a ni a ti a, NLUP kaltlanga he ruahmanna thar kalpui ani thei chu lawmawm a tih thu sawiin, Pathianin Mizoram tan programme tha tak NLUP min pe hi kan vannei hle a, NLUP kaltlang hian mirethei leh pachhe zawkte leirem rah tir a khaw eng hmuh tir hi A tum a ni tiin Pathian malsawmna dawng tlaka thawk tura rilru kan siam ve erawh a tul hle a ni a ti bawk. Chief Minister chuan NLUP chu a hrechiang apiangin tha an ti a, tunah hian India ramchhung mai nilo, India ram pawn atang UNO pawhin rawn hmelhriat tawhin NLUP hlawhtlinna atan hian an thiamna leh theihna te rawn thawh ve turin Aizawlah UNO Agency thenkhat chu an rawn in bun hial tawh a ni a ti bawk.

Chief Minister chuan he pilot project thar hlawhtlinna atan hian Department hrang hrangte thawhhona that a tul thu sawiin abik takin Agriculture Department pawhin he pilot project hlawhtlinna tur atan hian mawhphurhna an nei ani tih hria a Fisheries Department nen thawhhona tha tak nei tura a beisei thu a sawi bawk a ni.

Khualzahawm Dr. BD Chakma, Fisheries Minister pawhin NLUP kaltlanga he pilot project hi kalpui anih avangin Chief Minister leh NLUP hotute chungah lawmthu a sawi a, sangha khawi chu a hlawk in eizawnna tlak ani a, amaerawhchu sangha khawi dan dik leh sangha chi than en hmalak a pawimawh ani tiin sangha khawitute chu Department mithiamte rawn taima turin a chah bawk a ni.

Pu James Lalrinchhana, MCS, Secretary, NLUP Implementing Board pawhin Paddy-cum-Fish Culture chu Serchhip District leh Champhai District ah enchhin tura tih anih thu sawiin sangha leh buh thar kawpna tur a ni a, a hlawhtlin dan azirin huang zauh zel tum a ni a ti bawk.

NLUP Pilot Project “Buh leh Sangha khawi pawlh” (Paddy-cum-Fish Culture) hnuaiah hian Mat phai a leilet hecatare 129 a zau huamchhunga buh chingtute hnenah sangha chi leh a chaw Rs. nuaih 24 man hu sem a ni a, North Vanlaiphai a leilet leilet hecatare 120 a zau huamchhunga buh chingtute hnenah sangha chi leh a chaw Rs. nuaih 20 man hu sem niin; hectare khat atan sangha chi 1000 zel semchhuah a ni.

Vawiin programme hi Pu Thlamuana, Secretary, Fisheries Department in a kaihruai a, Pu SP Singh, Joint Director, Fisheries Department-in technical report pe in Pu BD Tyagi, Director, Fisheries Department in lawmthu sawina hun hmangin hnu a khar a ni.