Vawiin khan HPC Lunglei Vice-Chairman Pu S.Laldingliana kaihhruainain, ama office chamber-ah Lunglei khawpui chhunga Traffic enkawl dan mumal zawk a awm theih nana Parking Fee lak dan tur sawihona neih a ni a. Parking Fee lak dan hi HPC, Lunglei thuneihna hnuaiah kalpui tura ruahman a ni ang.

Meeting-ah hian Pu S.Laldingliana chuan ama hova Lunglei-a parking fee khawn chungchanga rawtna an lo siam tawhte chu Sorkar-in a lo pawm sak tawh thu a sawi a. Hemi zulzui hian Bazar Veng atanga AOC, Ramthar inkara Motor Park-na tur ruahmanna an siam tum dante chu vawiin meeting-ah hian sawiho a ni a. Parking Fee khawn dan tur hi Superintendent of Police, Lunglei-in mipuite hriattirna Notification chhuah phawt se, chumi hnuah chuan ‘reserve price’ siam leh nise tih rel a ni bawk.

Hetiang hian Lunglei khawchhunga Parking Area leh Park theih zat ruahman a ni : Bazar Veng chhungah Parking Area 22 siamin LMV-120, Auto Rickshaw-12, 207-19, Two wheeler-63 leh Bus Stop leh Dropping Zone- 5

Venglai-ah Parking Area 25 siamin LMV-85, Taxi-26, Auto Rickshaw-35, Two wheeler-58, Bus Stop leh Dropping Zone- 7

Electric Veng-ah Parking Area 6 siamin LMV-35, Taxi-8, Auto Rickhaw-8, Two wheeler-19 leh Dropping Zone-1

Chanmari-ah Parking Area 35 siamin LMV-125, Taxi-10, Auto Rickshaw-24, Two wheeler-139, Maxi Cab-8, Bus Stop leh Dropping zone-9 ve ve

Ramthar Veng-ah Parking Area 7 siamin LMV-39, Taxi-6, Auto rickshaw-6, Two wheeler-14 leh Dropping Zone-1.

Vawiin meeting-ah hian State Transport Authority(STA) member Pu Lallianzuala Khenglawt, Traffic OC, Transport Department aiawhte leh MJA member te an tel a ni.