SBI Lead Bank, Lunglei huaihawtin vawiin khan Saikuti Hall, Lunglei-ah 'Town Hall Meeting' neih a ni a, he hunah hian Sorkar Laipuiin mirethei ber ber te pawhin tlawmtea an neih ve theih tur Insurance leh Pension Scheme - Pradhan Mantri Suraksha Bima Yojana (PMSBY), Pradhan Mantri Jeevan Jyoti Bima Yojana (PMJJBY) leh Atal Pension Yojana (APY) - chungchang mipuite hnena hrilhfiah a ni.

Vawiina Town Hall Meeting neihah Khuallian Lunglei DC Pu Ashish Madhaorao chuan mipuite banphakah heng Scheme zawm theihna tur ruahmannn Bank lamin an siam chu a lawmawm hle a ni, a ti a. Sorkar Laipuiin mipui mimir tana hetiang Scheme hautak lo leh tlawm tak a ruahman chu mitin ten hmang tangkai se a duh thu a sawi a. Sorkar hnathawkte chu an service tawp hnu pawhin sorkarin pension a la pe zel a, mi tam zawk erawh chuan hetiang hi kan chan phak a nih loh avangin tuna Sorkar Laipui Scheme-te hi zawm ngei ngei chi a ni, a ti bawk. Mizoram-ah pawh lirthei chetsual (accident)-a thi te, chhiatrupna emaw leimin leh tuilian emaw avanga in leh lo, nunna hial chan te pawh an awm thin a, chuvangin heng Scheme hmanga tlawmtea Insurance nei chu a finthlak hle ang, a ti.

Vawiin Town Hall Meeting hi Pu James LH Pachuau, Chief Manager, Lead Bank, Lunglei-in a kaihruai a. SBI Lunglei-a PBD Manager Pu Henry H.Hrahsel-in 'Atal Pension Yojana' chungchang hrilhfiahna hun a hmang a; LIC Office, Aizawl atanga lo kal Pi Lalkhawngaihi Pachuau-in 'Pradhan Mantri Suraksha Bima Yojana' (PMSBY) leh 'Pradhan Mantri Jeevan Jyoti Bima Yojana' (PMJJBY) chungchang a sawifiah bawk.

Meeting zawhah a hmuna heng Scheme zawm duhte tan SBI Lead Bank Office, Lunglei chuan Counter siamin, a hmunah an tihfel sak nghal a. Sorkar Laipui chuan heng Scheme zawm duhte tan kumin September thla tawp thleng huna hawng a. Heng Scheme zawm duhte chuan Bank Account (eng Bank-ah pawh) an nei tur a ni a, passport size thlalak 2, EPIC Card/Aadhar Card leh Ration Card photocopy kengin Scheme hi zawm theih a ni.